امت نیوز ڈیسک //
راجوری: صوبہ جموں کے سرحدی ضلع راجوری میں لائن آف کنٹرول (ایل او سی) پر بارودی سرنگ پھٹنے سے ایک ’اگنی ویر‘ فوجی اہلکار ہلاک جبکہ دو دیگر زخمی ہو گئے ہیں۔ یہ دھماکہ ضلع راجوری کے نوشہرہ سیکٹر میں جمعرات کو پیش آیا۔ مقامی ذرائع کے مطابق یہ دھماکہ راجوری کے فارورڈ علاقے میں ہوا جس کے نتیجے میں تین فوجی اہلکار زخمی ہو گئے۔ زخمی ہونے والے تینوں فوجیوں کو کمانڈ اسپتال ادھمپور منتقل کر دیا گیا جہاں زخمی فوجی اہلکار زخموں کی تاب نہ کر فوت ہو گیا۔
فوت ہونے والے یا زخمی ہوئے اہلکاروں کی ابھی تک شناخت ظاہر نہیں کی گئی۔ قبل ازیں گزشتہ برس نومبر ماہ میں لائن آف کنٹرول پر صورتحال ایک بار پھر اس وقت کشیدہ ہوئی جب ضلع پوچھ کے منکوٹ علاقے میں لینڈ مائن پھٹنے سے دو فوجی اہلکار زخمی ہو گئے۔ یہ واقعہ یکم نومبر کو اُس وقت پیش آیا جب فوجی دستہ لائن آف کنٹرول پر معمول کے گشت پر مامور تھا۔ جموں ضلع کے ارنیا سیکٹر میں انڈو پاکستان انٹرنیشنل بارڈر پر پاکستانی رینجرز کی بلا اشتعال فائرنگ کے محض پانچ روز بعد ہی یہ لینڈ مائن بلاسٹ کا واقعہ پیش آیا تھا۔ پاکستانی رینجرز کی فائرنگ کے نتیجے میں بارڈر سکیورٹی فورس کا ایک اہلکار اور ایک مقامی خاتون زخمی ہو گئی تھی۔
بی ایس ایف کے ترجمان نے بتایا تھا کہ 26 اکتوبر کی شام تقریباً 8 بجے پاکستانی رینجرز نے ارنیہ سیکٹر، جموں میں بھارت – پاکستان انٹرنیشنل بارڈر پر بلا اشتعال فائرنگ شروع کی۔ ترجمان کے مطابق بی ایس ایف کے جوان بھی فوری طور پر مورچہ زن ہوئے تھے اور انہوں نے بھی جوابی فائرنگ کی۔
