امت نیوز ڈیسک //
جموں: وزیر اعظم نریندر مودی آج جموں وکشمیر کے دورے پر آرہے ہیں جس کے پیش نظر جموں صوبے کو فوجی چھاونی میں تبدیل کیا گیا ہے۔ اس دوران وزیر اعظم مودی کروڑوں روپے کی مالیت کے کئی پروجیکٹس کا سنگ بنیاد رکھنے کے علاوہ مولانا آزاد اسٹیڈیم میں ایک بھاری عوامی ریلی سے خطاب کریں گے۔
وزیراعظم مودی دورے کے دوران آئی آئی ٹی جموں، آئی آئی ایم جموں جیسے کئی اہم تعلیمی اداروں کا افتتاح کریں گے اور انہیں قوم کے نام وقف کریں گے۔ ایمس جموں کا سنگ بنیاد وزیر اعظم نے فروری 2019 میں رکھا تھا، اس کا افتتاح بھی وزیر اعظم اپنے دورے کے دوران کریں گے۔ ایک اہلکار نے بتایا کہ وزیر اعظم جموں ہوائی اڈے کی نئی ٹرمینل عمارت اور جموں میں مشترکہ صارف سہولت پٹرولیم ڈپو کا سنگ بنیاد رکھیں گے۔ وزیر اعظم مودی جموں و کشمیر میں کئی اہم سڑکوں اور ریل رابطے کے منصوبوں کا سنگ بنیاد رکھیں گے۔
پروگرام کے دوران وزیر اعظم جموں و کشمیر کے تقریباً 1500 نئے سرکاری بھرتیوں کو تقرری کے آرڈر تقسیم کریں گے۔ وزیر اعظم ’وکشت بھارت وکشت جموں‘ پروگرام کے ایک حصے کے طور پر مختلف سرکاری اسکیموں کے استفادہ کنندگان سے بھی بات چیت کریں گے۔
اطلاعات کے مطابق وزیر اعظم نریندر مودی کے جموں دورے کے پیش نظر سیکورٹی کے غیر معمولی انتظامات کئے گئے ہیں۔ جموں شہر کو فوجی چھاونی میں تبدیل کیا گیا ہے جبکہ ایم اے اسٹیڈیم کے اردگرد علاقوں کو سیکورٹی فورسز نے پوری طرح سے سیل کرکے لوگوں کے چلنے پھرنے پر بھی پابندی عائد کی ہے۔
ذرائع نے بتایا کہ جموں صوبے میں چپے چپے پر سیکورٹی فورسز کی تعیناتی عمل میں لائی گئی ہے جبکہ مشکوک نظر آنے والے افراد کو بغیر چیکنگ کے آگے جانے کی اجازت نہیں دی جارہی ہیں۔ دریں اثناء سری نگر میں بھی اتوار کی صبح سے ہی سیکورٹی فورسز نے مختلف علاقوں میں چیکنگ پوائنٹس قائم کئے جہاں پر نجی گاڑیوں کی باریک بینی سے تلاشی لی جارہی ہیں۔
قبل ازیں وزیر اعظم نریندر مودی کے دورہ جموں کے پیش نظر ایس ایس پی سیکورٹی جموں نے مولانا آزاد اسٹیدیم میں منعقد ہونے والی ریلی میں حصہ لینے والوں کے لئے ایک ایڈوائزری جاری کی ہے۔ اعلامیہ میں کہا گیا ہے کہ ‘شمالی جموں، راجوری، پونچھ، اودھم پور، ریاسی، ڈوڈہ، کشتواڑ، رام بن اضلاع سے آنے والے شرکا کا اسٹیدیم میں جی جی ایم سائنس کالج کی طرف سے داخل ہونے کی اجازت ہوگی’۔
وزیر اعظم دورے سے قبل کشمیر میں سکیورٹی کو چوکس رہنے کی ہدایت
ایڈوائزری میں لوگوں سے کہا گیا ہے کہ ریلی کے آغاز سے قبل مقررہ وقت یعنی ساڑھے نو بجے صبح اسٹیدیم پر پہنچیں۔ لوگوں سے شناختی پروف جیسے آدھار کارڈ، الیکشن کارڈ، پین کارڈ یا کوئی دوسرا شناختی کارڈ اپنے ساتھ رکھنے کی تاکید کی گئی ہے۔ ایڈوائزری میں اسٹیڈیم میں داخل ہونے سے قبل لوگوں سے جامہ تلاشی کرنے والے سیکورٹی اہلکاروں کے ساتھ تعاون کرنے اور قطار میں اپنی بھاری کا انتظار کرنے کی اپیل کی گئی ہے۔
(یو این آئی)
