امت نیوز ڈیسک //
منشیات کے خلاف جنگ کو جاری رکھتے ہوئے پولیس نے شمالی کشمیر کے ضلع بارہمولہ میں تین منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔ پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن بارہمولہ کی ٹیم نے ایک ناکے کے دوران خانپورہ بارہمولہ میں دو افراد کو روکا ۔
انہوں نے کہا کہ تلاشی کے دوران ان کی تحویل سے 140گرام ممنوع نشیلی اشیاءبرآمد ہوئی جس کے بعد دونوں کو دھر دبوچ کر سلاخوں کے پیچھے دھکیل دیاگیا۔بیان میں گرفتار شدگان کی شناخت آزاد احمد بٹ ولد غلام حسن ساکن نائد کھائی اور عاقب احمد گوجری ولد محمد ایوب ساکن باغ اسلام بارہ مولہ کے طور پر کی گئی ہے۔
اسی طرح کی ایک اور کارروائی کے دوران بونیار پولیس کی ایک ٹیم نے بمیار بونیار میں ایک ناکے پر موٹر سائیکل پر سوار منشیات فروش کو روکا ۔ پولیس ترجمان کے مطابق تلاشی کے دوران موٹر سائیکل سوار کی تحویل سے 40گرام ممنوع مواد برآمد کیا گیا ۔ جس کے بعد موٹر سائیکل سوار جس کی شناخت مدثر رشید وانی ولد عبدالرشید وانی ساکن گانٹہ مولہ کے بطور ہوئی کی گرفتاری عمل میں لائی گئی۔
پولیس ترجمان نے کہا کہ اس سلسلے میں پولیس اسٹیشن بارہمولہ اور پولیس اسٹیشن بونیار میں متعلقہ دفعات کے تحت مقدمے درج کرکے تحقیقات شروع کی گئی ہے۔قابل ذکر ہے کہ بارہمولہ پولیس نے ضلع میں سال رواں کے پہلے دو مہینوں کے دوران منشیات فروشوں کے خلاف این ڈی پی ایس ایکٹ کے تحت 39 مقدمے درج کرکے 62 منشیات فروشوں کی گرفتاری عمل میں لا کر ان کی زائد از ایک کروڑ روپے مالیت کی جائیدادوں کو ضبط کیا ہے۔
