امت نیوز ڈیسک //
سری نگر:ڈیجیٹل پولیسنگ کی طرف ایک اہم قدم میں ہندوارہ پولیس نے واٹس ایپ کے ذریعے درج کی گئی ایک شکایت پر پہلا الیکٹرانک فرسٹ انفارمیشن رپورٹ (ای ایف آئی آر) درج کیا ہے۔یہ ای ایف آئی آر پولیس اسٹیشن ولگام میں درج کیا گیا ہے۔
ایک پولیس ترجمان نے اپنے ایک بیان میں کہا کہ پولیس نے ضلع ہندوارہ کے پولیس اسٹیشن ولگام میں واٹس ایپ کے ذریعے ایک شکایت کے بعد پہلا الیکٹرانک فرسٹ انفارمیشن رپورٹ (ای ایف آئی آر) درج کیا ہے۔
انہوں نے کہا کہ امتیاز احمد ڈار ساکن محمد اسداللہ ڈار ساکن ہانجی پورہ کپوارہ، جو ایس آر ٹی سی بس نمبر JK01Y – 1121 کا ڈرائیور ہے، کی شکایت پر یہ ایف آئی آر درج کیا گیا۔بیان میں کہا گیا: ‘شکایت کے مطابق یہ واقعہ آج اس وقت پیش آیا جب امتیاز احمد تارتھ پورہ سے سری نگر جا رہا تھا’۔
پولیس ترجمان نے بتایا: ‘ شکایت گذار کا الزام ہے کہ ولگام پہنچنے پر عاشق حسین بٹ اور گوہر احمد بٹ پسران صمد بٹ ساکنان شہنی پورہ ولگام نامی دو افراد نے اس کو غلط طریقے سے روکا اور جسمانی طور پر حملہ کیا اور مبینہ طور پر ملزمان نے جھگڑے کے دوران اسے جسمانی طور پر زخمی کیا’۔
انہوں نے کہا کہ اس شکایت پر پولیس اسٹیشن ولگام میں بی این ایس کے دفعات 115(2) اور126(2) کے تحت ایک ای ایف آئی آر نمبر9/2025 درج کیا گیا۔ان کا کہنا ہے کہ یہ تاریخی قدم قانون نافذ کرنے والے نظاموں کے اندر ٹیکنالوجی کے بڑھتے ہوئے انضمام کو اجاگر کرتا ہے جو خطے میں تیز تر اور زیادہ قابل رسائی انصاف کی فراہمی کے طریقہ کار کی مثال قائم کرتا ہے۔
