امت نیوز ڈیسک //
پلوامہ: جنوبی کشمیر کے ضلع پلوامہ میں وزیر اعلیٰ عمر عبداللہ نے رہمو علاقے میں نالہ رومشی پر تعمیر کیے گئے روما ریشی پل کا افتتاح کیا۔ اس موقع پر عمر عبداللہ سمیت پارٹی کے دیگر لیڈران نے عوام سے خطاب کیا۔ یاد رہے کہ یہ پل سال 2014 کے تباہ کن سیلاب میں بہہ گیا تھا، جسے اب جدید طرز پر دوبارہ تعمیر کیا گیا۔
تقریب کے حاشیہ پر صحافیوں سے گفتگو کرتے ہوئے وزیر اعلیٰ نے کہا: نیشنل کانفرنس ریاست کی خودمختاری کی بحالی اور جموں و کشمیر کے عوام کے دیگر جائز مطالبات پورے کرنے کے لیے سنجیدہ کوششیں کر رہی ہے۔‘‘ دوران خطاب عمر عبداللہ نے دعویٰ کیا کہ انہیں ریاستی درجہ کی بحالی کے حوالہ سے تنقید کا نشانہ بنایا جا رہا ہے حالانکہ ’’ریاستی درجہ کی بحالی نیشنل کانفرنس کی منزل مقصود نہیں، بلکہ یہ ایک سیڑھی ہے اور اصل منزل کا پہلا پڑاؤ، جس کے ذریعے نیشنل کانفرنس دیگر مطالبات اور حقوق منوائے گی۔‘‘
عمر عبداللہ نے وقف ایکٹ پر جموں کشمیر اسمبلی میں گفتگو سے انکار پر اسپیکر عبدالرحیم راتھر کا دفاع کیا، تاہم انہوں نے کہا کہ ’’ہم نے سپریم کورٹ سے رجوع کیا ہے۔ اب دیکھنا ہے کہ عدالت اس پر کیا فیصلہ سناتی ہے۔‘‘ جموں کشمیر کے ریاستی درجہ کی بحالی سے متعلق پوچھے گئے سوال کے جواب میں وزیر اعلیٰ نے بتایا: ’’حال ہی میں مرکزی وزیر داخلہ امیت شاہ نے جموں سمیت سرینگر کا دورہ کیا، میری ان سے اچھی ملاقات ہوئی، اور میں پُرامید ہوں کہ جموں و کشمیر کو جلد ریاستی درجہ واپس ملے گا۔‘‘
