امت نیوز ڈیسک //
سرینگر، 5 اکتوبر: محکمہ تعلیم نے سرکاری اساتذہ اور ملازمین کو سوشل میڈیا کے مبینہ غلط استعمال پر سخت انتباہ جاری کرتے ہوئے کہا ہے کہ خلاف ورزی کرنے والوں کے خلاف سروس رولز کے تحت سخت تادیبی کارروائی کی جائے گی۔
تفصیلات کے مطابق، محکمہ تعلیم کے سیکرٹری کی ہدایت پر 3 اکتوبر کو ہونے والی جائزہ میٹنگ کے بعد، چیف ایجوکیشن آفیسر (سی ای او) بارہ مولہ نے ایک حکم نامے میں کہا کہ بعض سرکاری ملازمین سوشل میڈیا پلیٹ فارمز پر محکمہ جاتی پالیسی معاملات میں مداخلت کر رہے ہیں، جو کہ جی اے ڈی سرکیولر نمبر 09-JK of 2023 اور سرکاری حکم نمبر 1646-JK of 2017 کی خلاف ورزی ہے۔
حکم نامے میں چیف ایجوکیشن آفیسران کو ہدایت دی گئی ہے کہ ایسے کسی بھی خلاف ورزی کے معاملے کو فوری طور پر رپورٹ کریں تاکہ متعلقہ ملازمین کے خلاف تادیبی کارروائی عمل میں لائی جا سکے۔
احکامات میں کہا گیا ہے کہ خلاف ورزی کرنے والوں کو مختلف سزائیں دی جا سکتی ہیں، جن میں تنبیہ ، ایک ماہ کی تنخواہ تک جرمانہ، ترقی یا انکریمنٹ روکنا، تنزلی، سرکاری نقصان کی وصولی، قبل از وقت ریٹائرمنٹ، ملازمت سے برطرفی یا آئندہ سرکاری ملازمت کے لیے نااہلی شامل ہیں۔
سی ای او نے وضاحت کی کہ ان ہدایات کا مقصد سوشل میڈیا کے تعمیری استعمال کو روکنا نہیں ہے، بلکہ صرف غیر ضروری تبصرے، غیر موزوں پوسٹس، مباحثے یا غیر متعلقہ مواد کے اشتراک کو ممنوع قرار دینا ہے۔
حکم نامے میں تمام سرکاری اساتذہ اور محکمہ تعلیم کے ملازمین، ضلع بارہ مولہ میں، کو ہدایت دی گئی ہے کہ وہ ان احکامات پر مکمل طور پر عمل کریں تاکہ کسی بھی تادیبی کارروائی سے بچا جا سکے۔
