امت نیوز ڈیسک //بارہمولہ
کشمیر سے شائع ہونے والے ہفتہ روزہ اخبارات کی نمائندہ تنظیم "وایس آف ویکلی نیوز پیپرس آف کشمیر” کا ایک وفد آج بارہمولہ میں محکمہ اطلاعات و تعلقاتِ عامہ کے جوائنٹ ڈائریکٹر سید شہنواز بخاری صاحب کے دولت کدہ پر تعزیت کے لیے حاضر ہوا۔ یاد رہے کہ بخاری صاحب کی محترمہ دادی جان حال ہی میں اس فانی دنیا سے رخصت ہوکر اپنے خالقِ حقیقی سے جا ملی تھیں۔
وفد میں معروف صحافی و کالم نگار محمد شاہد ڈار، ارشد احمد میر، عاصم فاروق، بلال احمد درزی اور شبنم جاوید شامل تھے۔ وفد کے اراکین نے غمزدہ خاندان کے ساتھ دلی ہمدردی و یکجہتی کا اظہار کیا اور مرحومہ کے ایصالِ ثواب کے لیے فاتحہ خوانی کی۔
اس موقع پر وفد کے ارکان نے دعا کی کہ "اللہ رب العزت مرحومہ کو جنت الفردوس میں اعلیٰ مقام عطا فرمائے، پسماندگان کو صبرِ جمیل اور حوصلہ عطا کرے۔ آمین۔”
واضح رہے کہ اس سے قبل ویس آف ویکلی نیوز پیپرس آف کشمیر کے تمام اراکین کی جانب سے سرینگر میں ایک تعزیتی نشست منعقد کی گئی تھی، جس میں مرحومہ کے حق میں دعائے مغفرت اور فاتحہ خوانی کی گئی۔ اسی موقع پر ایک نمائندہ وفد تشکیل دیا گیا تاکہ وہ بارہمولہ جاکر بخاری خاندان سے بالمشافہ تعزیت پیش کرے۔
وفد کے اراکین نے کہا کہ سید شہنواز بخاری نہ صرف ایک قابل، مخلص اور دیانتدار افسر ہیں بلکہ ایک شریف النفس، درد مند اور سماجی خدمت کے جذبے سے سرشار شخصیت بھی ہیں۔ ان کے خاندان نے ہمیشہ علم، تہذیب اور اخلاقی اقدار کی پاسداری کو اپنی روایت بنایا ہے۔
یہ تعزیتی ملاقات ایک پُرسوز اور باوقار ماحول میں انجام پائی، جس میں مرحومہ کی نیکیوں، شفقت اور روحانی اثرات کو عقیدت و احترام کے ساتھ یاد کیا گیا۔
