امت نیوز ڈیسک //
سری نگر، 21 جنوری : کابینہ وزیر اور نیشنل کانفرنس کی سینئر رہنما سکینہ ایتو نے بدھ کے روز بھارتیہ جنتا پارٹی پر تقسیم کی سیاست کرنے کا الزام عائد کرتے ہوئے کہا کہ نیشنل کانفرنس جموں و کشمیر کی وحدت پر مضبوطی سے قائم ہے۔
نامہ نگاروں سے گفتگو کرتے ہوئے سکینہ ایتو نے کہا کہ بی جے پی ہمیشہ سماج میں تقسیم سے فائدہ اٹھاتی رہی ہے، جبکہ نیشنل کانفرنس اتحاد، ہم آہنگی اور جامع سیاست پر یقین رکھتی ہے۔ انہوں نے کہا کہ پارٹی کا مقصد جموں و کشمیر کو متحد رکھنا اور عوام کے حقوق و امنگوں کا تحفظ کرنا ہے۔
سکینہ ایتو نے کہا کہ نیشنل کانفرنس کا ماننا ہے کہ لداخ کو ایک بار پھر جموں و کشمیر کا حصہ بنایا جانا چاہیے۔ انہوں نے خطے کی خصوصی حیثیت کی بحالی کے ساتھ ساتھ ملازمت اور اراضی حقوق کی واپسی کا مطالبہ بھی دہرایا۔
وزیر موصوفہ نے کہا کہ نیشنل کانفرنس کی سیاست عوام کی شناخت، وقار اور آئینی حقوق کے تحفظ پر مبنی ہے، جو کہ ان کے بقول بی جے پی کے تقسیم پر مبنی ایجنڈے کے بالکل برعکس ہے۔
انہوں نے اس عزم کا اظہار کیا کہ نیشنل کانفرنس اتحاد اور حقوق کی بحالی کے لیے اپنی آواز بلند کرتی رہے گی اور یہ مسائل پارٹی کے سیاسی ویژن کا مرکزی حصہ ہیں۔(کے این ٹی)
