امت نیوز ڈیسک //
دبئی: انٹرنیشنل کرکٹ کونسل (آئی سی سی) نے ٹی ٹوئنٹی ورلڈ کپ 2026 میں بنگلہ دیش کی شرکت کے معاملے پر سخت مؤقف اختیار کرتے ہوئے واضح کر دیا ہے کہ اگر بنگلہ دیش نے بھارت میں میچ کھیلنے سے انکار برقرار رکھا تو اسے ٹورنامنٹ سے باہر کر کے کسی دوسری ٹیم کو شامل کر لیا جائے گا۔
بدھ کے روز آئی سی سی بورڈ کا ایک اہم اجلاس منعقد ہوا، جس میں چیئرمین جے شاہ کے علاوہ تمام فل ممبر ممالک کے ڈائریکٹرز نے شرکت کی۔ اجلاس میں اکثریتی ووٹ کے ذریعے یہ فیصلہ کیا گیا کہ بنگلہ دیش کو متبادل ٹیم سے بدل دیا جائے، اگر وہ اپنے موجودہ مؤقف پر قائم رہا۔
اجلاس میں بنگلہ دیش کرکٹ بورڈ (بی سی بی) کے صدر امین الاسلام بلبُل بھی موجود تھے۔ آئی سی سی نے بی سی بی کو ایک دن کی مہلت دی ہے تاکہ وہ بھارت میں میچ کھیلنے کے فیصلے پر نظرِ ثانی کر سکے۔
ذرائع کے مطابق بنگلہ دیش کو اس معاملے میں پاکستان کی حمایت حاصل ہے، تاہم آئی سی سی نے واضح کر دیا ہے کہ ٹورنامنٹ کے شیڈول اور انتظامات پر کوئی سمجھوتہ نہیں کیا جائے گا۔
ای ایس پی این کرک انفو کے مطابق آئی سی سی نے بی سی بی کو ہدایت دی ہے کہ وہ عبوری بنگلہ دیش حکومت کو بھی آگاہ کرے کہ اگر لٹن داس کی قیادت میں ٹیم کو بھارت نہ بھیجا گیا تو بنگلہ دیش کی جگہ کسی اور ٹیم کو ٹی ٹوئنٹی ورلڈ کپ میں شامل کر لیا جائے گا۔
اب سب کی نظریں بنگلہ دیش کرکٹ بورڈ کے آئندہ فیصلے پر مرکوز ہیں، جو ٹورنامنٹ میں اس کی قسمت کا تعین کرے گا۔
