امت.نیوز ڈیسک//
جموں، 20 جنوری : سابق وزیر اعلیٰ اور نیشنل کانفرنس کے صدر ڈاکٹر فاروق عبداللہ نے پی ڈی پی رہنما اور سابق وزیر اعلیٰ محبوبہ مفتی کی جانب سے چناب اور پیر پنجال خطوں کے لیے الگ ڈویژن بنانے کی تجویز کو ڈکسن پلان قرار دیا ہے۔
کے این او کے مطابق، میڈیا سے بات کرتے ہوئے فاروق عبداللہ نے کہا کہ یہ کوئی نیا خیال نہیں بلکہ ایک پرانا منصوبہ ہے۔
انہوں نے کہا،“یہ ڈکسن پلان ہے۔ شاید آپ کو اس کا علم نہ ہو۔ ڈکسن پلان ایک پرانی تجویز تھی جس کے تحت دریائے چناب کی بنیاد پر تقسیم کا تصور پیش کیا گیا تھا، جس میں دریا کے ایک طرف گریٹر کشمیر ویلی اور دوسری طرف اس حصے کو الگ کرنے کی بات کی گئی تھی۔”
این سی صدر نے واضح کیا کہ نیشنل کانفرنس جموں و کشمیر سے لداخ کو الگ کرنے کے خلاف رہی ہے۔
انہوں نے سوال اٹھایا،“لداخیوں کو علیحدگی سے کیا فائدہ ہوا؟ آج لداخ کے لوگ دوبارہ جموں و کشمیر کے ساتھ الحاق کی بات کر رہے ہیں اور کہہ رہے ہیں کہ انہیں یو ٹی درجہ نہیں چاہیے۔”
فاروق عبداللہ نے مزید کہا کہ اگرچہ کچھ عناصر ریاست کو توڑنے کی کوشش کر رہے ہیں، مگر وہ اپنے عزائم میں کامیاب نہیں ہوں گے۔
