امت نیوز ڈیسک //
سرینگر، 11 فروری :سرینگر کے گنجان آباد علاقے حبہ کدل میں منگل کی دیر رات آگ لگنے کے واقعے میں کم از کم چھ رہائشی مکانات کو نقصان پہنچا، جبکہ ایک فائر مین سمیت تین افراد زخمی ہوگئے۔
حکام کے مطابق فائر اینڈ ایمرجنسی سروسز کے کنٹرول روم کو رات 10 بج کر 32 منٹ پر اطلاع موصول ہوئی، جس کے بعد حبہ کدل، بابا ڈیم اور گاؤکدل فائر اسٹیشنوں سے فائر ٹینڈرز کو فوری طور پر موقع پر روانہ کیا گیا۔
حکام نے بتایا کہ علاقے کی تنگ گلیوں اور گنجان تعمیرات کے باعث ابتدائی طور پر آگ بجھانے کی کارروائی میں مشکلات پیش آئیں، جس کے بعد شہر کے دیگر اسٹیشنوں سے اضافی گاڑیاں طلب کی گئیں۔
ریسکیو آپریشن کے دوران دو سے تین ایل پی جی سلنڈروں کے دھماکوں نے آگ کی شدت میں اضافہ کر دیا، جس کے نتیجے میں مکانات کے بالائی حصے (اٹاری) زیادہ متاثر ہوئے۔
واقعے میں ایک فائر مین کے ہاتھ پر چوٹ آئی، جبکہ دو شہری معمولی زخمی ہوئے۔ تینوں زخمیوں کو مقامی اسپتال منتقل کیا گیا جہاں ابتدائی علاج کے بعد انہیں ڈسچارج کر دیا گیا۔
فائر اینڈ ایمرجنسی سروسز کے ڈپٹی ڈائریکٹر ڈاکٹر میر عاقب حسین، جنہوں نے موقع پر کارروائی کی نگرانی کی، نے بتایا کہ آگ لگنے کی وجوہات کا ابھی تعین نہیں ہو سکا ہے اور اس سلسلے میں تحقیقات جاری ہیں۔
انہوں نے کہا کہ “سینئر افسران نے وسائل کی بروقت فراہمی کو یقینی بنایا۔ متاثرہ مکانات کی صحیح تعداد کی تصدیق کی جا رہی ہے، تاہم کم از کم چھ مکانات کو نمایاں نقصان پہنچا ہے۔”
