امت نیوز ڈیسک //
جموں و کشمیر حکومت نے جمعہ کو قانون ساز اسمبلی کو آگاہ کیا کہ کشمیر ڈویژن میں 3,982 کنال اور 1.5 مرلہ کسٹوڈین (مہاجرین) اراضی غیر قانونی قبضے یا عدالتی مقدمات کی زد میں ہے۔
یہ معلومات ایم ایل اے عبدالمجید لارمی کے سوال کے جواب میں محکمہ مال کی جانب سے فراہم کی گئیں۔
سرکاری جواب کے مطابق جموں اور کشمیر دونوں ڈویژنوں میں کل نوٹیفائیڈ مہاجرین (کسٹوڈین) اراضی 1,44,932 کنال اور 6 مرلہ ہے۔
کشمیر ڈویژن میں کل نوٹیفائیڈ مہاجرین اراضی 55,960 کنال اور 15.25 مرلہ ہے، جس میں سے 3,982 کنال، 1.5 مرلہ اور 97 مربع فٹ اراضی غیر قانونی قبضے یا عدالتی تنازعات میں شامل ہے۔
حکومت نے بتایا کہ غیر قانونی قبضہ ہٹانے کے لیے محکمہ کسٹوڈین پراپرٹی نے جموں و کشمیر ایویکیو (ایڈمنسٹریشن آف پراپرٹی) ایکٹ 2006 اور اس کے تحت بنائے گئے قواعد کے مطابق کارروائی شروع کر رکھی ہے۔
سرکاری بیان میں مزید کہا گیا کہ گزشتہ چند برسوں کے دوران کشمیر ڈویژن میں 2,441 کنال، 1.5 مرلہ اور 97 مربع فٹ مہاجرین اراضی غیر قانونی قابضین سے واگزار کرائی گئی ہے، جبکہ کچھ اراضی تاحال عدالتی کارروائی میں زیر سماعت ہے اور اس کی بازیابی قانون کے مطابق عمل میں لائی جائے گی۔
