امت نیوز ڈیسک //
واشنگٹن، 17 مارچ:امریکی صدر ڈونلڈ ٹرمپ نے ایران کے ساتھ جاری کشیدگی اور جنگ کے حوالے سے کہا ہے کہ یہ تنازع زیادہ دیر تک جاری نہیں رہے گا اور جلد ختم ہو سکتا ہے۔ ان کے مطابق اس کے خاتمے کے بعد دنیا پہلے سے زیادہ محفوظ ہو جائے گی۔
وائٹ ہاؤس میں صحافیوں سے گفتگو کرتے ہوئے ٹرمپ نے کہا: “یہ زیادہ لمبا نہیں چلے گا، ہم اسے جلد سمیٹ لیں گے اور دنیا زیادہ محفوظ ہوگی۔” انہوں نے مزید کہا کہ یہ قدم اٹھانا ان کی ذمہ داری تھی، چاہے وہ خود ایسا نہیں چاہتے تھے۔
صدر ٹرمپ نے اپنے فیصلے کا دفاع کرتے ہوئے کہا کہ اگر بروقت کارروائی نہ کی جاتی تو خطرات کہیں زیادہ بڑھ سکتے تھے۔ ان کا کہنا تھا کہ دشمن کو ایٹمی حملوں کی اجازت دینا عالمی معیشت کے لیے تباہ کن ہو سکتا تھا۔
چین کا دورہ مؤخر
ٹرمپ نے بتایا کہ انہوں نے چین کے صدر شی جن پنگ سے طے شدہ ملاقات مؤخر کرنے کا فیصلہ کیا ہے۔ ان کے مطابق موجودہ جنگی صورتحال کے پیش نظر ان کا امریکہ میں رہنا زیادہ ضروری ہے۔ انہوں نے کہا کہ چین کے ساتھ بات چیت جاری ہے اور ممکنہ طور پر یہ ملاقات ایک ماہ کے لیے مؤخر کی جا سکتی ہے۔
