امت نیوز ڈیسک //
سرینگر : جموں و کشمیر انتظامیہ نے ہفتہ کو کالعدم جماعت اسلامی (جے آئی) اور اس کے فلاح عام ٹرسٹ سے منسلک 58 اسکولوں کی انتظامی کمیٹیوں کو اپنے نگرانی میں لینے کا حکم دیا ہے۔ حکام کی جانب سے یہ کارروائی منفی انٹیلی جنس رپورٹس اور اسکولوں کے انتظامی جواز کی میعاد ختم ہونے کے بعد کی گئی ہے۔
محکمۂ اسکول ایجوکیشن نے وزارت داخلہ کے نوٹیفکیشن کو طلب کیا جس میں کالعدم جماعت اسلامی کو غیر قانونی سرگرمی روک تھام ایکٹ ( یو اے پی اے ) کے تحت غیر قانونی تنظیم قرار دیا گیا تھا۔ مذکورہ 58 فعال اسکولوں کا تعلق براہ راست کالعدم تنظیم سے ہے یا یہ ٹرسٹی کے طور اسکولوں سے بالواسطہ یا بلاواسطہ وابستہ تھے۔
ڈپٹی کمشنر کو اسکولوں کا کنٹرول سنبھالنے کی ہدایت
ایک عہدیدار نے کہا کہ ڈپٹی کمشنر کو ہدایت کی گئی ہے کہ وہ اسکولوں کا کنٹرول سنبھالیں اور نئی تصدیق شدہ کمیٹیاں تجویز کریں تاکہ یہ یقینی بنایا جاسکے کہ طلباء کا تعلیمی مستقبل متاثر نہ ہو۔
اسکولوں میں سرکاری ٹیمیں تعینات
اس سلسلہ میں حکام نے کہا کہ اس اقدام کا مقصد قومی تعلیمی پالیسی (این ای پی) کے اصولوں کے مطابق بغیر کسی رکاوٹ کے معیاری تعلیم کو برقرار رکھنا ہے۔ انہوں نے کہا کہ تمام 58 اسکولوں میں سرکاری ٹیمیں تعینات کر دی گئی ہیں۔
