امت نیوز ڈیسک //
شوپیاں، یکم مئی : جنوبی کشمیر کے ضلع شوہیان میں ایک نالہ میں گر کر لاپتہ ہونے والے پلوامہ کے چار سالہ بچے کی لاش جمعہ کے روز رنبیارہ نالہ کے ہیرپورہ علاقے سے برآمد کر لی گئی۔
ایک سرکاری عہدیدار نے خبر رساں ایجنسی کشمیر نیوز آبزرور (کے این او) کو بتایا کہ متوفی کی شناخت محمد حنظلہ ولد نجار احمد تُرّے، ساکن ٹیکن گاؤں پلوامہ کے طور پر ہوئی ہے، جو 27 اپریل کو دبجن پل کے نزدیک تیز بہاؤ والے نالہ میں گر گیا تھا۔
انہوں نے کہا کہ تیز پانی کے بہاؤ نے بچے کو فوراً بہا دیا تھا۔
عہدیدار کے مطابق، “پانچ روزہ تلاش کے بعد آج صبح بچے کی لاش نالہ کے نچلے حصے سے برآمد کی گئی۔”
انہوں نے مزید بتایا کہ واقعے کے فوراً بعد فوج، جموں و کشمیر پولیس اور اسٹیٹ ڈیزاسٹر ریسپانس فورس کی ٹیموں نے ریسکیو آپریشن شروع کیا تھا۔
اس دوران نالہ کے گہرے حصوں میں تلاش کے لیے خصوصی آلات کا استعمال کیا گیا جبکہ مزید نفری بھی تعینات کی گئی۔ ریسکیو کارروائی کو مؤثر بنانے کے لیے ڈوڈہ سے تعلق رکھنے والے ماہر رضاکار غوطہ خوروں کی خدمات بھی حاصل کی گئیں۔
