امت نیوز ڈیسک //
سری نگر، 02 مئی: رکن پارلیمنٹ انجینئر رشید کے والد خضر محمد شیخ کو ہفتہ کے روز بہتر اور جدید طبی علاج کے لیے دہلی منتقل کر دیا گیا۔
ذرائع کے مطابق، خضر محمد شیخ سری نگر کے ایس ایم ایچ ایس اسپتال میں زیر علاج تھے، جہاں سے انہیں ایک خصوصی کریٹیکل کیئر ایمبولینس کے ذریعے سری نگر ایئرپورٹ پہنچایا گیا۔ وہاں سے انہیں قومی راجدھانی دہلی ایئر لفٹ کرنے کے تمام انتظامات مکمل کیے گئے۔
یہ ایمبولینس ہیلپ پور والنٹیر ٹرسٹ کی جانب سے فراہم کی گئی تھی، جو جدید طبی سہولیات سے لیس تھی۔ مریض کے ساتھ ماہر طبی عملہ بھی موجود تھا، جس میں کنسلٹنٹ اینستھیزیا ڈاکٹر سید فیصل اندرابی، سینئر ریزیڈنٹ ڈاکٹر محمد آدم خان، اور اینستھیزیا ٹیکنیشن منیر احمد شیخ شامل تھے۔ اس کے علاوہ دو معاونین فیصل اور ابرار بھی مریض کے ہمراہ تھے۔
حکام کا کہنا ہے کہ مریض کی نازک حالت کے پیش نظر انہیں دہلی منتقل کیا گیا تاکہ انہیں خصوصی علاج فراہم کیا جا سکے، اور منتقلی کے دوران تمام ضروری احتیاطی تدابیر اختیار کی گئیں۔
واضح رہے کہ اس سے قبل ایم پی انجینئر رشید اپنے علیل والد کی عیادت کے بعد اسپتال سے واپس لوٹے تھے۔
