امت نیوز ڈیسک //
پونچھ، 10 مئی: پی ڈی پی صدر محبوبہ مفتی نے کہا ہے کہ جموں و کشمیر مسئلے کا کوئی مستقل حل بات چیت کے بغیر ممکن نہیں اور مرحوم مفتی محمد سعید کے سیاسی خاکے پر عمل کرنا ناگزیر ہے۔
پونچھ میں عوامی اجتماع سے خطاب کرتے ہوئے محبوبہ مفتی نے دعویٰ کیا کہ حکومت کی سخت پالیسی کے باوجود پاکستان کے ساتھ خفیہ مذاکرات جاری ہیں۔ انہوں نے کہا کہ ریٹائرڈ سفارتکار، جرنیل اور دیگر شخصیات بیرونِ ممالک میں پاکستانی حکام سے ملاقاتیں کر رہی ہیں۔
انہوں نے کہا: “لوگ آپریشن سندھور کی بات کرتے ہیں، مگر آج بھی پاکستان کے ساتھ خفیہ بات چیت جاری ہے۔ آخرکار مذاکرات کی میز پر آنا ہی پڑے گا۔”
محبوبہ مفتی نے واضح کیا کہ ان کا دورہ ووٹ مانگنے کے لیے نہیں بلکہ عوام کے مسائل سننے کے لیے ہے۔ انہوں نے کہا کہ جموں و کشمیر کے لوگ شدید ذہنی دباؤ، بے روزگاری اور مایوسی کا شکار ہیں۔
انہوں نے کہا کہ نوجوان مایوسی کے باعث منشیات، شراب نوشی اور دیگر غلط سرگرمیوں کی طرف جا رہے ہیں، جبکہ خودکشی کے واقعات میں بھی اضافہ ہو رہا ہے۔
محبوبہ مفتی نے بی جے پی کو تنقید کا نشانہ بناتے ہوئے کہا کہ چاہے حکومت کچھ بھی کرے، آخرکار اسے پاکستان کے ساتھ مذاکرات کرنا ہی پڑیں گے۔
انہوں نے سرحد پار تجارت، عوامی رابطوں اور علاقائی مفاہمت کو خطے میں امن و استحکام کے لیے ضروری قرار دیا۔
یاد رہے کہ اس سے قبل گاندربل میں محبوبہ مفتی نے بعض تعلیمی اداروں کی بندش پر بھی اعتراض اٹھایا تھا اور کہا تھا کہ غریب طلبہ کے لیے کام کرنے والے اداروں کو بند کیا جا رہا ہے۔
