امت نیوز ڈیسک //
پلوامہ، 19 مئی: جموں و کشمیر کے لیفٹیننٹ گورنر منوج سنہا نے آج پلوامہ میں ’’نشہ مُکت جموں و کشمیر‘‘ مہم میں شرکت کی اور عوام سے منشیات کے خلاف فیصلہ کن جنگ لڑنے کی اپیل کی۔
اپنے خطاب میں لیفٹیننٹ گورنر نے کہا کہ گزشتہ 39 دنوں کے دوران جموں و کشمیر کے مختلف اضلاع میں عوامی بیداری میں نمایاں اضافہ دیکھنے کو ملا ہے۔ انہوں نے کہا کہ پڑوسی ایک دوسرے کا سہارا بنے اور سب سے اہم بات یہ رہی کہ طویل عرصے سے چھائی خاموشی اب ٹوٹنے لگی ہے۔
انہوں نے کہا، ’’آج وہ خاموشی منشیات کے خلاف ایک مضبوط اجتماعی آواز میں بدل چکی ہے۔ ہماری لڑائی خوف، لالچ اور تباہی سے چلنے والے ایک وسیع نارکو ٹیرر نیٹ ورک کے خلاف ہے۔‘‘
لیفٹیننٹ گورنر نے منشیات فروشوں اور نارکو ملی ٹنٹوں کو سخت وارننگ دیتے ہوئے کہا، ’’ہم تمہیں تمہارے گہرے ٹھکانوں تک ڈھونڈ نکالیں گے۔ ہمارا مشن صرف گرفتاریاں نہیں بلکہ نارکو ٹیرر کے پورے نیٹ ورک کا خاتمہ اور اس زہر کی جڑوں کو اکھاڑ پھینکنا ہے۔‘‘
انہوں نے مزید کہا کہ بارہمولہ، جموں، سانبہ، ادھم پور، کٹھوعہ، سری نگر اور دیگر اضلاع میں نوجوانوں اور والدین نے منشیات کے خلاف جدوجہد کے لیے بھرپور عزم کا مظاہرہ کیا ہے۔
