امت نیوز ڈیسک //
ڈوڈہ، 4 جون: ڈوڈہ سے رکن اسمبلی اور عام آدمی پارٹی جموں و کشمیر کے ریاستی صدر مہراج ملک نے لیفٹیننٹ گورنر جموں و کشمیر، کو ایک خط ارسال کرکے اپنی سیکیورٹی کے لیے فراہم کی گئی ایسکارٹ گاڑی فوری طور پر بحال کرنے کا مطالبہ کیا ہے۔
4 جون 2026 کو لکھے گئے اپنے سرکاری خط میں مہراج ملک نے کہا کہ ان کی سیکیورٹی ایسکارٹ حال ہی میں واپس لے لی گئی ہے، حالانکہ اس حوالے سے وہ پہلے بھی متعلقہ حکام کو اپنی تشویش سے آگاہ کر چکے ہیں۔
خط میں انہوں نے کہا کہ وہ ڈوڈہ کے منتخب رکن اسمبلی اور عام آدمی پارٹی جموں و کشمیر کے ریاستی صدر ہیں اور اپنی سیاسی و عوامی سرگرمیوں کے باعث انہیں سیکیورٹی کے سنگین خدشات لاحق ہیں۔
مہراج ملک کے مطابق ایسکارٹ گاڑی کی واپسی نے انہیں خطرات سے دوچار کر دیا ہے، خاص طور پر اس صورت حال میں جب انہیں عوامی اجتماعات میں شرکت، لوگوں سے ملاقاتوں اور جموں و کشمیر بھر میں مسلسل سفر کرنا پڑتا ہے۔ انہوں نے کہا کہ عوامی ذمہ داریوں کی مؤثر انجام دہی اور ذاتی تحفظ کے لیے ایسکارٹ گاڑی کا برقرار رہنا ناگزیر ہے۔
انہوں نے مزید کہا کہ اس معاملے کو وہ پہلے بھی تحریری طور پر متعلقہ حکام کے سامنے اٹھا چکے ہیں، تاہم اب تک کوئی کارروائی عمل میں نہیں لائی گئی۔ انہوں نے لیفٹیننٹ گورنر سے فوری مداخلت کرتے ہوئے ایسکارٹ گاڑی بحال کرنے یا برقرار رکھنے کی اپیل کی ہے۔
سوشل میڈیا پر خط شیئر کرتے ہوئے مہراج ملک نے لکھا کہ انہوں نے ایک بار پھر معزز لیفٹیننٹ گورنر کو خط لکھا ہے کیونکہ ان کی سیکیورٹی اور ایسکارٹ واپس لے لی گئی ہے۔
