امت نیوز ڈیسک //
سری نگر، 25 جون: جموں و کشمیر کے وزیر اعلیٰ عمر عبداللہ نے ایک ماہ کی طویل معطلی کے بعد گلمرگ گونڈولا سروس کی بحالی کا باضابطہ افتتاح کیا۔ اس موقع پر سیاحت سے وابستہ افراد، مقامی تاجروں اور سیاحوں میں خوشی کی لہر دوڑ گئی۔
افتتاحی تقریب میں وزیر اعلیٰ کے مشیر ناصر اسلم وانی، ایم ایل اے گلمرگ فاروق احمد شاہ، منیجنگ ڈائریکٹر گلمرگ گونڈولا پروجیکٹ سید قمر سجاد، ڈپٹی کمشنر بارہمولہ سید فخرالدین حمید، ایس ایس پی بارہمولہ گرندر پال سنگھ اور دیگر اعلیٰ سول و پولیس افسران موجود تھے۔
گلمرگ گونڈولا سروس 25 مئی 2026 سے معطل تھی، جب خراب موسم اور شدید بارش کے دوران کیبل کار کے پہلے مرحلے میں تکنیکی خرابی پیدا ہوگئی تھی۔ اس کے باعث سیاحتی سرگرمیاں متاثر ہوئیں اور سیاحوں سمیت مقامی کاروباری طبقے کو مشکلات کا سامنا کرنا پڑا۔
اس موقع پر خطاب کرتے ہوئے وزیر اعلیٰ عمر عبداللہ نے سروس کی بحالی پر اطمینان کا اظہار کیا اور تکنیکی ماہرین، انجینئروں اور انتظامیہ کی کاوشوں کو سراہا۔ انہوں نے کہا کہ گلمرگ گونڈولا جموں و کشمیر کی سیاحت کا ایک اہم اثاثہ ہے جو ملک اور بیرونِ ملک سے آنے والے سیاحوں کو اپنی جانب متوجہ کرتا ہے۔
افتتاح کے فوراً بعد سینکڑوں سیاحوں نے گونڈولا سروس سے لطف اٹھایا اور سروس کی بحالی کا خیر مقدم کیا۔ سیاحوں کا کہنا تھا کہ گونڈولا کی سواری کشمیر کے یادگار ترین سیاحتی تجربات میں شمار ہوتی ہے۔
واضح رہے کہ 25 مئی کو تکنیکی خرابی کے باعث 65 گونڈولا کیبنوں میں 300 سے زائد سیاح پھنس گئے تھے۔ بعد ازاں بھارتی فوج، این ڈی آر ایف، ایس ڈی آر ایف، جموں و کشمیر پولیس اور مقامی انتظامیہ کی مشترکہ کارروائی کے ذریعے تمام سیاحوں کو بحفاظت نکال لیا گیا تھا۔
حکام کے مطابق سروس کی بحالی سے قبل مکمل تکنیکی جانچ، حفاظتی آڈٹ، مرمتی کام اور متعدد آزمائشی مراحل کامیابی سے مکمل کیے گئے تاکہ سیاحوں کی حفاظت کو یقینی بنایا جا سکے۔
دنیا کے بلند ترین کیبل کار منصوبوں میں شمار ہونے والا گلمرگ گونڈولا کشمیر کی سیاحت کی شناخت سمجھا جاتا ہے۔ اس کی بحالی سے موسمِ گرما کے دوران سیاحوں کی آمد میں اضافہ متوقع ہے، جس سے مقامی تاجروں، ہوٹل مالکان، ٹرانسپورٹ آپریٹروں اور دیگر متعلقہ شعبوں کو فائدہ پہنچے گا۔
