امت نیوز ڈیسک //
سرینگر، 28 جون: چیف الیکشن کمشنر گیانیش کمار آج سرکاری دورے پر کشمیر پہنچ گئے، جہاں وہ ضلع بڈگام میں بوتھ لیول افسران سے ملاقات کریں گے اور انتخابی عمل سے متعلق مختلف امور کا جائزہ لیں گے۔
سرینگر پہنچنے پر میڈیا سے گفتگو کرتے ہوئے چیف الیکشن کمشنر نے کہا کہ اس دورے کا مقصد ووٹروں اور بوتھ لیول افسران سے براہِ راست بات چیت کرنا ہے، کیونکہ یہ افسران الیکشن کمیشن کی بنیاد اور انتخابی نظام کا اہم ستون ہیں۔
انہوں نے کہا، "ہم جموں و کشمیر کی خوبصورت وادیوں میں ووٹروں سے ملاقات کریں گے اور خاص طور پر بڈگام کے بوتھ لیول افسران سے بات چیت کریں گے، جو انتخابی عمل کو مؤثر بنانے میں کلیدی کردار ادا کرتے ہیں۔”
گیانیش کمار نے جموں و کشمیر کے ووٹروں کو نیک خواہشات پیش کرتے ہوئے وادی کے قدرتی حسن کی بھی تعریف کی اور کہا کہ ملاقاتوں کے بعد وہ کشمیر کے دلکش مناظر سے بھی لطف اندوز ہوں گے۔
سرکاری ذرائع کے مطابق اس دورے کا مقصد ووٹروں تک رسائی کو مزید مضبوط بنانا اور نچلی سطح پر انتخابی تیاریوں کا جائزہ لینا ہے۔ بوتھ لیول افسران ووٹر فہرستوں کی دیکھ بھال، نئے ووٹروں کے اندراج اور انتخابات کے شفاف انعقاد میں اہم کردار ادا کرتے ہیں۔
