تانترے اظہر نصیر
انسان اس دنیا کی سب سے اشرف مخلوق ہے۔ اس کی عظمت صرف اس کی عقل، علم یا طاقت میں نہیں بلکہ اس کے کردار، اخلاق اور انسانیت سے محبت میں پوشیدہ ہے۔ ایک ایسا انسان جو دوسروں کے دکھ کو اپنا دکھ سمجھے، ضرورت مند کے آنسو پونچھے، بھوکے کو کھانا کھلائے، بیمار کی عیادت کرے، یتیم کے سر پر شفقت کا ہاتھ رکھے اور بے سہارا لوگوں کی مدد کے لیے آگے بڑھے، وہی حقیقی معنوں میں انسان کہلانے کا حق دار ہے۔ یہی وجہ ہے کہ دنیا کے تمام آسمانی مذاہب، اخلاقی تعلیمات اور مہذب معاشروں نے انسانیت کی خدمت کو سب سے اعلیٰ عمل قرار دیا ہے۔
آج کا دور ترقی، سہولت اور جدید ٹیکنالوجی کا دور ضرور ہے، لیکن اس کے ساتھ ساتھ بے حسی، خود غرضی اور مادہ پرستی بھی بڑھتی جا رہی ہے۔ لوگ ایک دوسرے کے قریب ہونے کے باوجود دلوں سے دور ہوتے جا رہے ہیں۔ رشتے کمزور پڑ رہے ہیں، اعتماد ختم ہو رہا ہے اور معاشرے میں ہمدردی کا جذبہ ماند پڑتا جا رہا ہے۔ ایسے حالات میں انسانیت کی جانب اٹھایا گیا ایک قدم بھی سینکڑوں دلوں میں امید کی شمع روشن کر سکتا ہے۔
انسانیت کی خدمت ہمیشہ بڑے وسائل کی محتاج نہیں ہوتی۔ کئی مرتبہ ایک مسکراہٹ، ایک حوصلہ افزا جملہ، ایک دلاسہ، ایک خیر خواہی یا کسی پریشان حال شخص کی بات سن لینا بھی خدمت خلق کا عظیم نمونہ بن جاتا ہے۔ بہت سے لوگ یہ سمجھتے ہیں کہ صرف دولت مند افراد ہی دوسروں کی مدد کر سکتے ہیں، حالانکہ حقیقت یہ ہے کہ اگر نیت خالص ہو تو ہر شخص اپنی استطاعت کے مطابق انسانیت کی خدمت کر سکتا ہے۔
اسلام نے بھی انسانیت کے احترام اور خدمت کو غیر معمولی اہمیت دی ہے۔ قرآن کریم انسانوں کے ساتھ عدل، احسان، رحم اور خیر خواہی کی تعلیم دیتا ہے۔ رسول اکرم صلی اللہ علیہ وسلم کی پوری زندگی انسانیت کے لیے رحمت، محبت اور شفقت کا روشن نمونہ ہے۔ آپ نے ہمیشہ کمزوروں، یتیموں، مسکینوں، بیواؤں اور مظلوموں کے حقوق کی حفاظت کی۔ آپ نے یہ سبق دیا کہ بہترین انسان وہ ہے جو دوسروں کے لیے سب سے زیادہ فائدہ مند ہو۔
اگر ہم تاریخ کا مطالعہ کریں تو معلوم ہوگا کہ عظیم شخصیات نے اپنی کامیابی کا معیار دولت یا اقتدار کو نہیں بلکہ انسانیت کی خدمت کو بنایا۔ جن لوگوں نے اپنے علم، صلاحیت، وقت اور وسائل کو دوسروں کی بھلائی کے لیے وقف کیا، آج بھی دنیا انہیں عزت اور احترام کی نگاہ سے دیکھتی ہے۔ ان کے نام زندہ ہیں کیونکہ انہوں نے انسانوں کے دل جیتے۔
خدمت خلق صرف مالی امداد کا نام نہیں۔ ایک استاد کا اپنے شاگرد کو دیانت داری سے تعلیم دینا، ایک ڈاکٹر کا اخلاص کے ساتھ مریض کا علاج کرنا، ایک صحافی کا سچ لکھنا، ایک وکیل کا مظلوم کا ساتھ دینا، ایک سرکاری ملازم کا ایمانداری سے اپنے فرائض انجام دینا اور ایک نوجوان کا معاشرے کی اصلاح کے لیے آگے بڑھنا بھی انسانیت کی خدمت ہے۔ ہر شخص اپنے مقام پر رہتے ہوئے معاشرے میں مثبت تبدیلی لا سکتا ہے۔
ہم اپنے ارد گرد نظر دوڑائیں تو بے شمار لوگ ایسے ملیں گے جنہیں ہماری توجہ، محبت اور تعاون کی ضرورت ہے۔ کوئی غربت سے لڑ رہا ہے، کوئی بیماری سے، کوئی تنہائی سے، کوئی بے روزگاری سے اور کوئی ذہنی دباؤ کا شکار ہے۔ اگر ہم ان کی مدد نہیں کر سکتے تو کم از کم انہیں احساس دلائیں کہ وہ اکیلے نہیں ہیں۔ بعض اوقات یہی احساس کسی ٹوٹے ہوئے انسان کو دوبارہ زندگی کی طرف واپس لے آتا ہے۔
معاشرے کی تعمیر صرف حکومتوں کی ذمہ داری نہیں ہوتی۔ ہر شہری کی ذمہ داری ہے کہ وہ اپنے حصے کا کردار ادا کرے۔ اگر ہر شخص روزانہ صرف ایک نیکی کا عہد کر لے، ایک ضرورت مند کی مدد کرے، ایک بچے کی تعلیم میں تعاون کرے، ایک بیمار کی عیادت کرے، ایک درخت لگائے، ماحول کو صاف رکھے یا کسی پریشان انسان کی دلجوئی کرے تو پورا معاشرہ بدل سکتا ہے۔ بڑی تبدیلی ہمیشہ چھوٹے قدموں سے شروع ہوتی ہے۔
نوجوان کسی بھی قوم کا سرمایہ ہوتے ہیں۔ اگر ان کے اندر خدمت خلق، دیانت، برداشت اور سماجی ذمہ داری کا جذبہ پیدا کیا جائے تو مستقبل روشن ہو سکتا ہے۔ نوجوان اپنی توانائی کو مثبت سرگرمیوں میں استعمال کریں، رضاکارانہ خدمات انجام دیں، خون کے عطیات کی مہمات میں حصہ لیں، تعلیمی معاونت فراہم کریں اور معاشرے کے کمزور طبقوں کا سہارا بنیں۔ یہی حقیقی قیادت کی پہچان ہے۔
خواتین بھی انسانیت کی خدمت میں اہم کردار ادا کرتی ہیں۔ ایک ماں اپنے بچوں کی بہترین تربیت کے ذریعے پورے معاشرے کی بنیاد مضبوط کرتی ہے۔ ایک معلمہ، ایک ڈاکٹر، ایک سماجی کارکن یا ایک ذمہ دار شہری کے طور پر خواتین معاشرے میں محبت، برداشت اور خیر خواہی کے فروغ میں نمایاں کردار ادا کر سکتی ہیں۔
آج سوشل میڈیا ہماری زندگی کا اہم حصہ بن چکا ہے۔ اگر اس کا مثبت استعمال کیا جائے تو یہ انسانیت کی خدمت کا مؤثر ذریعہ بن سکتا ہے۔ کسی ضرورت مند کی مدد کے لیے آواز اٹھانا، تعلیم، صحت اور اخلاقیات سے متعلق مفید معلومات عام کرنا، نفرت کے بجائے محبت اور برداشت کا پیغام دینا اور جھوٹی خبروں سے اجتناب کرنا بھی سماجی خدمت کی ایک شکل ہے۔
خدمت خلق کا ایک اہم پہلو ماحول کی حفاظت بھی ہے۔ صاف پانی، صاف ہوا، سرسبز ماحول اور قدرتی وسائل کا تحفظ آئندہ نسلوں کے لیے ہماری ذمہ داری ہے۔ درخت لگانا، پانی کا ضیاع روکنا، صفائی کا خیال رکھنا اور ماحول دوست طرز زندگی اپنانا بھی انسانیت کی خدمت ہے کیونکہ اس سے پوری مخلوق کو فائدہ پہنچتا ہے۔
کسی بھی معاشرے کی اصل طاقت اس کی عمارتیں، سڑکیں یا بازار نہیں ہوتے بلکہ وہاں بسنے والے انسانوں کا کردار ہوتا ہے۔ جہاں رحم، انصاف، دیانت اور خدمت کا جذبہ زندہ ہو، وہاں امن، ترقی اور خوش حالی خود بخود جنم لیتی ہے۔ لیکن جہاں خود غرضی، نفرت اور بے حسی غالب آ جائے، وہاں ترقی بھی لوگوں کو حقیقی سکون نہیں دے سکتی۔
ہمیں اپنے دلوں سے یہ سوچ نکال دینی چاہیے کہ ایک فرد کچھ نہیں کر سکتا۔ حقیقت یہ ہے کہ ہر بڑی تحریک کا آغاز ایک فرد اور ایک قدم سے ہوا ہے۔ اگر ایک شخص ایک چراغ روشن کرے تو دوسرا بھی اس سے روشنی حاصل کر سکتا ہے۔ یہی روشنی آگے بڑھتے بڑھتے پورے معاشرے کو منور کردیتی ہے۔ تبدیلی ہمشہ دوسروں سے نہیں خود اپنے آپ سے شروع ہوتی ہے۔ جب ہر فرد اپنی ذہ داری کو پہچان لے، نیکی، خدمت اور دینانت داری کا راستہ اختیار کرے تو ایک بہتر، باوقار اور خوشحال معاشرہ خود بخود وجود میں آجاتا ہے۔
