امت نیوز ڈیسک //
گاندربل، 8 جولائی: ضلع گاندربل میں جاری شری امرناتھ یاترا کی ڈیوٹی کے دوران مبینہ غفلت برتنے کے الزام میں چار اساتذہ کو فوری طور پر معطل کر دیا گیا ہے۔
چیف ایجوکیشن آفیسر (سی ای او) گاندربل کی جانب سے جاری حکم نامے کے مطابق یہ کارروائی نوڈل آفیسر، منی گام ٹرانزٹ کیمپ (اسسٹنٹ کمشنر ریونیو) گاندربل کی سفارش پر عمل میں لائی گئی۔
معطل کیے گئے اساتذہ میں بلال احمد شیخ (ہری پورہ کنگن)، عابد محی الدین بھٹ (منی گام)، پیر مدثر (وُسان) اور گوہر راشد کلو (گنڈ) شامل ہیں۔
حکم نامے میں بتایا گیا ہے کہ معطلی کا فیصلہ 7 جولائی 2026 کو نوڈل آفیسر کی جانب سے بھیجے گئے مکتوب کی بنیاد پر کیا گیا اور یہ حکم فوری طور پر نافذ العمل ہو گیا۔
تاہم، حکم نامے میں مبینہ غفلت یا بدانتظامی کی نوعیت کی تفصیلات بیان نہیں کی گئی ہیں۔ حکام کے مطابق یہ کارروائی منی گام ٹرانزٹ کیمپ میں جاری امرناتھ یاترا کے انتظامات سے متعلق تفویض کردہ ذمہ داریوں میں مبینہ کوتاہی کے سلسلے میں کی گئی ہے۔
