امت نیوز ڈیسک //
سری نگر، 9 جولائی: جموں و کشمیر کے لیفٹیننٹ گورنر منوج سنہا نے جمعرات کو پنتھا چوک، سری نگر میں امرناتھ یاترا ٹرانزٹ کیمپ اور یاتری نواس کا دورہ کرکے جاری شری امرناتھ یاترا کے لیے کیے گئے انتظامات کا جائزہ لیا۔
اس موقع پر لیفٹیننٹ گورنر نے عہدیداروں اور یاتریوں سے ملاقات کی اور رہائش، خوراک، صفائی، صحت، پینے کے پانی، بجلی، سکیورٹی اور دیگر بنیادی سہولیات کے بارے میں معلومات حاصل کیں۔ انہوں نے حکام کو ہدایت دی کہ ہر یاتری کو چوبیس گھنٹے بہترین سہولیات فراہم کی جائیں اور کسی بھی قسم کی دشواری پیش نہ آئے۔
منوج سنہا نے کہا کہ اس سال گزشتہ برس کے مقابلے میں زیادہ تعداد میں یاتری امرناتھ یاترا میں شریک ہو رہے ہیں، جو نہ صرف مذہبی اہمیت رکھتا ہے بلکہ جموں و کشمیر میں سیاحت اور مقامی معیشت کے لیے بھی ایک مثبت اشارہ ہے۔
انہوں نے مختلف محکموں، ضلعی انتظامیہ، شری امرناتھ شرائن بورڈ، پولیس اور سکیورٹی فورسز کی مشترکہ کوششوں کو سراہتے ہوئے ہجوم کے مؤثر انتظام، آسان رجسٹریشن اور یاتریوں کو بروقت معلومات فراہم کرنے پر زور دیا۔ ساتھ ہی انہوں نے جعلی رجسٹریشن میں ملوث افراد کے خلاف سخت قانونی کارروائی کی ہدایت بھی دی۔
