ڈیسک رپورٹ/نورالعین
صوبہ جموںکے ضلع رام بن کے دور افتادہ علاقے کراہ (زون بانیہال) میں پیش آنے والا ایک ایسا افسوسناک واقعہ، جس میں ایک 13 سالہ طالب علم کئی گھنٹوں تک سرکاری اسکول کے اندر بند رہا، صرف ایک انفرادی غفلت نہیں بلکہ سرکاری تعلیمی نظام کی کمزور نگرانی، انتظامی بے احتیاطی اور طلبہ کی حفاظت سے متعلق ناقص انتظامات کی ایک تشویشناک تصویر پیش کرتا ہے۔
واقعہ 4 جولائی 2026 کو اس وقت پیش آیا جب گورنمنٹ مڈل اسکول کراہ میں موسم گرما کی تعطیلات سے قبل آخری تدریسی دن تھا۔ تعطیلات کے باعث طلبہ کھیل کود میں مصروف تھے، جبکہ ساتویں جماعت کا ایک طالب علم، جو مسلسل نیند کی کمی کا شکار تھا، کلاس روم میں سو گیا۔ اسکول بند کرتے وقت نہ اساتذہ نے کلاس روموں کی مکمل جانچ کی اور نہ ہی کسی نے اس طالب علم کی موجودگی کا نوٹس لیا۔ نتیجتاً اسکول کے تمام دروازے بند کر دیے گئے اور بچہ کئی گھنٹوں تک اندر ہی محبوس رہا۔
شام تقریباً سات بجے طالب علم کی آنکھ کھلی تو اس نے خود کو بند اسکول میں پایا۔ اس کی مدد کے لیے بلند آواز میں پکارنے پر مقامی لوگوں نے تالے توڑ کر اسے باہر نکالا اور بحفاظت اس کے اہلِ خانہ کے حوالے کیا۔
واقعے کی ویڈیو منظر عام پر آنے کے بعد محکمۂ تعلیم نے فوری کارروائی کرتے ہوئے گورنمنٹ مڈل اسکول کراہ کےپورے عملے کو معطل کر دیا۔ چیف ایجوکیشن آفیسر، رام بن کی جانب سے جاری حکم نامے میں اس واقعے کو بادی النظر میں سنگین غفلت اور فرائض سے انحراف قرار دیتے ہوئے کہا گیا کہ متعلقہ ملازمین کی لاپروائی سے طالب علم کی جان کو خطرہ لاحق ہو سکتا تھا۔ اسی حکم کے تحت جموں و کشمیر سول سروسز (درجہ بندی، کنٹرول و اپیل) قواعد، 1956 کے رول 31 کے تحت تمام ملازمین کو معطل کیا گیا، جبکہ تین رکنی تحقیقاتی کمیٹی تشکیل دے کر تین روز کے اندر رپورٹ طلب کی گئی۔
اگرچہ چند گھنٹوں کے لیے ایک بچے کا بند اسکول میں رہ جانا بظاہر ایک حادثہ معلوم ہو سکتا ہے، لیکن جب اس واقعے کو قانونی، انتظامی اور تعلیمی پالیسیوں کی روشنی میں دیکھا جائے تو یہ واضح ہوتا ہے کہ متعدد سطحوں پر احتیاطی ذمہ داریاں پوری نہیں کی گئیں۔
طالب علم کی مسلسل تھکن کی اصل وجہ
تحقیقات اور اہل خانہ کے بیانات سے معلوم ہوا کہ مذکورہ طالب علم صبح سرکاری اسکول میں تعلیم حاصل کرتا تھا جبکہ شام کے بعد ایک مدرسے میں بھی زیر تعلیم تھا، جہاں وہ رات گئے تک پڑھائی کرتا اور علی الصبح نماز کے لیے بیدار ہو جاتا تھا۔ اسی مسلسل معمول کے باعث وہ شدید نیند کی کمی کا شکار تھا۔
اسکول کے سربراہ کے مطابق وہ کئی مرتبہ والدین کو متنبہ کر چکے تھے کہ بچے کی صحت اور تعلیم دونوں متاثر ہو رہی ہیں اور اسے ایک ہی تعلیمی ادارے میں رکھا جائے، تاہم خاطر خواہ پیش رفت نہ ہو سکی۔ واقعے کے بعد والد نے اپنے بیٹے کو مدرسے سے واپس لے لینے کا اعلان کیا۔
صرف چند معطلیاں مسئلے کا حل نہیں
اگرچہ متعلقہ عملے کی معطلی ایک فوری انتظامی کارروائی ہے، لیکن یہ سوال اپنی جگہ موجود ہے کہ کیا صرف چند ملازمین کو معطل کر دینا مسئلے کا مستقل حل ہے؟ حقیقت یہ ہے کہ سرکاری اسکولوں میں نگرانی، احتساب اور حفاظتی طریقۂ کار کے حوالے سے کئی برسوں سے سنگین خامیاں موجود ہیں۔
ماہرین تعلیم کے مطابق بیشتر اسکولوں میں طلبہ کی حاضری، روانگی، عمارت کی جانچ اور حفاظتی معائنہ جیسے بنیادی انتظامی امور محض رسمی کارروائی بن کر رہ گئے ہیں۔ متعدد اسکولوں میں اساتذہ کی کمی، غیر تدریسی ذمہ داریوں کا بوجھ، بنیادی سہولیات کی قلت اور مؤثر نگرانی کے فقدان نے تعلیمی ماحول کو متاثر کیا ہے۔
محکمۂ تعلیم کی مجموعی صورتِ حال
جموں و کشمیر میں گزشتہ چند برسوں کے دوران تعلیمی شعبے میں بنیادی ڈھانچے کی بہتری، ڈیجیٹل تعلیم اور انتظامی اصلاحات کے دعوے ضرور کیے گئے، تاہم زمینی سطح پر متعدد سرکاری اسکول آج بھی اساتذہ کی کمی، بنیادی سہولیات کے فقدان، نگرانی کی کمزوری اور جوابدہی کے غیر مؤثر نظام جیسے مسائل سے دوچار ہیں۔
تعلیمی ماہرین کا کہنا ہے کہ اگر ہر اسکول میں چھٹی سے قبل تمام کمروں، بیت الخلاؤں، کھیل کے میدانوں اور دیگر حصوں کی لازمی جانچ کا معیاری طریقۂ کار نافذ ہو اور اس پر سختی سے عمل درآمد کرایا جائے تو اس نوعیت کے افسوسناک واقعات سے آسانی سے بچا جا سکتا ہے۔
فوری متبادل انتظام
محکمۂ تعلیم نے اس معاملے میں انتظامی کاروائی کے بعدتعلیمی سرگرمیوں کو متاثر ہونے سے بچانے کے لیے اسکول میں پانچ اساتذہ، ایک ہیڈ آف انسٹی ٹیوشن، دو این وائی سیز اور ایک فزیکل ایجوکیشن ٹیچر کی فوری تعیناتی بھی عمل میں لائی ہے تاکہ طلبہ کی تعلیم کا سلسلہ متاثر نہ ہو۔
اصلاحات وقت کی ضرورت
کراہ کا واقعہ صرف ایک اسکول یا ایک طالب علم کا معاملہ نہیں بلکہ پورے تعلیمی نظام کے لیے ایک تنبیہ ہے۔ اگر سرکاری اسکولوں میں طلبہ کی حفاظت، انتظامی نگرانی، جوابدہی اور والدین کے ساتھ مؤثر رابطے کو مضبوط نہ بنایا گیا تو مستقبل میں بھی ایسے واقعات کے امکانات کو رد نہیں کیا جا سکتا۔
تعلیم صرف نصاب مکمل کرنے کا نام نہیں بلکہ بچوں کو محفوظ، باوقار اور اطمینان بخش تعلیمی ماحول فراہم کرنا بھی ریاست اور محکمۂ تعلیم کی بنیادی ذمہ داری ہے۔ کراہ کا واقعہ اسی ذمہ داری کی یاد دہانی ہے، جس سے سبق سیکھ کر مؤثر اصلاحات نافذ کرنا وقت کا اہم تقاضا ہے۔
