امت نیوز ڈیسک //
بڈگام، 17 جولائی: وسطی کشمیر کے ضلع بڈگام کے چاڈورہ علاقے میں بیلی پل کے قریب پیش آئے ایک سڑک حادثے میں اسپیشل آپریشنز گروپ (ایس او جی) کا ایک اہلکار جاں بحق جبکہ دوسرا زخمی ہو گیا۔
اطلاعات کے مطابق دونوں اہلکار سرکاری گاڑی میں سفر کر رہے تھے کہ گاڑی بیلی پل کے فولادی شہتیر سے ٹکرا گئی، جس کے نتیجے میں دونوں زخمی ہو گئے۔ انہیں فوری طور پر قریبی اسپتال منتقل کیا گیا، جہاں ڈاکٹروں نے ایک اہلکار کو مردہ قرار دے دیا، جبکہ دوسرے کا علاج جاری ہے۔
جاں بحق اہلکار کی شناخت ہنجورہ کے رہائشی طارق احمد کے طور پر ہوئی ہے، جبکہ زخمی اہلکار ریاض احمد ہیں۔ پولیس نے واقعے کا مقدمہ درج کر کے تحقیقات شروع کر دی ہیں۔
