امت نیوز ڈیسک //
نئی دہلی: کانگریس کے نئے صدر انتخابات کے لیے ووٹنگ جاری ہے۔ نئے صدر کے انتخاب کے لیے کانگریس کے سینئر لیڈر ملکارجن کھرگے اور ششی تھرور کے درمیان مقابلہ ہے۔ ووٹوں کی گنتی اور نتائج کا اعلان 19 اکتوبر کو دہلی میں ہوگا۔ کانگریس کی عبوری صدر سونیا گاندھی، جنرل سکریٹری پرینکا گاندھی واڈرا، سابق وزیر اعظم منموہن سنگھ اور سی ڈبلیو سی کے دیگر ارکان اور سینئر لیڈروں سمیت کل 75 کانگریس کے نمائندے دہلی میں اے آئی سی سی ہیڈکوارٹر میں اپنا ووٹ ڈالیں گے۔ دہلی کانگریس کے دفتر میں 280 قائدین اپنا ووٹ ڈالیں گے۔
کانگریس صدر کے عہدے کے لیے 9300 سے زیادہ پی سی سی کے نمائندے ووٹ دیں گے۔ ووٹنگ کا عمل خفیہ رائے شماری کے ذریعے ہوگا۔ کانگریس کی سینٹرل الیکشن اتھارٹی (سی ای اے) کے مطابق صدر کے انتخاب کے لیے مختلف ریاستوں میں 36 پولنگ اسٹیشن اور 67 بوتھ بنائے گئے ہیں۔ ہر 200 ووٹروں کے لیے ایک بوتھ قائم کیا گیا ہے۔ اتر پردیش میں سب سے زیادہ پولنگ بوتھ بنائے گئے ہیں۔
