امت نیوز ڈیسک //
سرینگر:سنٹرل بیرو آف انویسٹی نے پولیس سب انسپکٹرز امتحانات میں بدعنوانیوں میں ملوث مزید سات افراد کو گرفتار کیا ہے۔ ان افراد میں پولیس اور سی آر پی ایف اہلکار شامل ہیں۔
سی بی آئی کے مطابق گرفتار شدہ اہلکاروں میں سی آر پی ایف کے پوون کمار، اتل کمار، امت کمار شرما اور سنیل کمار شرما اور پولیس اسسٹنٹ سب انسپکٹر (اے ایس آئی) جیسوریا شرما شامل ہیں۔ اس کے علاوہ مزید دو افراد ترسم لال اور اشیش یادو کو بھی گرفتار کیا گیا ہے۔ سی بی آئی نے گزشتہ ماہ ان بدعنوانیوں میں ملوث بارڈر سیکورٹی فورس (بی ایس ایف) کے کمانڈنٹ ڈاکٹر کرنیل سنگھ کو گرفتار کیا تھا۔
غور طلب ہے کہ جموں و کشمیر سروس سلیکشن بوڈ (ایس ایس بی) نے گزشتہ برس پولیس میں سب انسپکٹرز کی بارہ سو اسامیوں کی بھرتی کا عمل شروع کیا تھا۔ ان اسامیوں کے تحریری امتحانات کے نتائج میں امیدواروں نے بے ضابطگیوں کا الزام لگایا تھا اور جموں میں ایس ایس بی کے خلاف احتجاج کرکے اس میں جانچ کا مطالبہ کیا تھا احتجاج اور تنقید کے بعد ایل جی انتظامیہ نے چیف سیکرٹری ارون کمار مہتا کی سربراہی میں جانچ کمیٹی تشکیل دی تھی اور اس کمیٹی نے نتائج میں بے ضابطگیوں کا انکشاف کیا تھا۔
سی بی آئی نے اب تک قریبا 33 ملوثین کے خلاف مقدمے درج کئے ہیں اور ان میں 13 ملزمین گرفتار ہوچکے ہیں۔ سی بی آئی کے مطابق یہ امتحانی پرچے ملزمین نے 15 سے 30 لاکھ روپئے کے عوض خریدے تھے۔ ایس ایس بی نے ان امتحانات کو دسمبر میں دوبارہ منعقد کرنا کا اعلان کیا ہے۔
