امت نیوز ڈیسک //
نئی دہلی: کانگریس قائد راہول گاندھی نے پیر کے دن کہا کہ وزیراعظم نریندر مودی پوری کوشش کریں گے کہ پارلیمنٹ میں اڈانی مسئلہ پر بحث ٹل جائے۔ انہوں نے زور دے کر کہا کہ ملک کو جاننا چاہئے کہ اس امیرکبیر تاجر کے پیچھے کونسی طاقت ہے۔
راہول گاندھی نے نئی دہلی میں میڈیا نمائندوں سے کہا کہ مودی جی‘ اڈانی جی پر بحث ٹلانے کی پوری کوشش کریں گے۔ اس کی ایک وجہ ہے اور آپ جانتے ہیں۔ میں چاہتا ہوں کہ اڈانی مسئلہ پر بحث ہو اور سچ سامنے آئے۔ لاکھوں کروڑوں کا جو کرپشن ہوا ہے وہ سامنے آنا چاہئے۔
ملک کو پتہ چلنا چاہئے کہ اڈانی جی کے پیچھے کونسی طاقت کارفرما ہے۔ انہوں نے کہا کہ میں کئی سال سے حکومت کے بارے میں ”ہم دو ہمارے دو“ کی بات کررہا ہوں۔ حکومت‘ پارلیمنٹ میں اڈانی جی پر بحث نہیں چاہتی۔
وہ اس سے ڈری ہوئی ہے۔ حکومت کو بحث ہونے دینی چاہئے۔ اسے ٹالنے کی کوششیں ہوں گی۔ کانگریس نے اڈانی۔ ہنڈن برگ مسئلہ پر حکومت پر تنقید تیز کردی ہے۔
وہ چاہتی ہے کہ اس پر پارلیمنٹ میں بحث ہو۔ کانگریس کا الزام ہے کہ معاملہ اڈانی گروپ میں عوام کے کروڑہا روپیوں کی سرمایہ کاری کا ہے۔ ہنڈن برگ ریسرچ رپورٹ سامنے آنے کے بعد سے اڈانی گروپ کے شیئرس میں گراوٹ جاری ہے۔
