امت نیوز ڈیسک//
سرینگر:جموں کشمیر پولیس نے محروس علیحدگی پسند لیڈر شبیر شاہ کی دختر سحر شبیر شاہ کی جانب سے سکیورٹی فورسز پر تلاشی کے دوران اہل خانہ کی طرف سے ہراساں کرنے کے الزامات کو مسترد کر دیا۔
پولیس کی جانب سے جاری بیان میں کہا گیا ہے کہ شہر کے صنعت نگر علاقے میں عسکریت پسندوں کے موجودگی کے متعلق اطلاع کے بعد اس علاقے میں بیس رہائشی مکانوں کی تلاشی لی گئی جس میں شبیر شاہ کا بھی گھر شامل ہے۔پولیس نے کہا کہ مذکورہ خاتون یعنی سحر شبیر شاہ نے اس تلاشی کو جی ٹوئنٹی سے منسلک کیا ہے اور سکیورٹی فورسز پر بے بنیاد الزام لگائے جبکہ حقیقت یہ ہے کہ سکیورٹی فورسز نے اس تلاشی کے دوران تمام ایس او پیز پر عمل کیا ہے۔پولیس نے سابق وزیر اعلیٰ محبوبہ مفتی کے ٹویٹ پر بھی ردعمل دیتے ہوئے کہا کہ یہ عجیب بات ہے کہ ایک سابق وزیر اعلیٰ بھی اس تلاشی کارروائی کو جی ٹوئنٹی سے منسلک کر رہی ہیں جبکہ مذکورہ وزیر اعلیٰ کو اس تلاشی کے متعلق جانکاری تھی۔
قابل غور ہے کہ شبیر شاہ کی دختر نے کہا ہے کہ گزشتہ شام جی ٹوئنٹی سے قبل پولیس، سی آر پی ایف اور فوج نے ان کے گھر کا محاصرہ کرکے تلاشی لی تھی جس دوران سکیورٹی فورسز نے اہل خانہ کو ہراساں کیا اور گھر کے اندر سامان کا تہس نہس کر دیا۔انہوں نے ٹویٹر پر ویڈیوز جاری کرتے ہوئے بتایا کہ””اگر یہ G20 کی وجہ سے تھا تو یہ آج ہمیں ہراساں کرنے کی اعلی ترین سطح ہے”
واضح رہے کہ سرینگر میں 22 اور 25 مئی کے مابین بین الاقوامی سطح کا جی ٹوئینٹی "ٹورزم ورکنگ گروپ” کا اجلاس منعقد ہورہا ہے جس میں دو سو سے زائد مندوبین شرکت کر رہے ہیں۔جی ٹوئنٹی میں دنیا کے بیس بڑے ممالک بشمول ارجنٹینا، آسٹریلیا، برازیل، کینیڈا، چین، جرمنی، فرانس، بھارت، انڈونیشیا، اٹلی، جاپان، میکسیکو، روس، سعودی عرب، جنوبی افریقہ، جنوبی کوریا، ترکیہ، برطانیہ ہے۔ان ممالک کے ممبران وادی میں سمٹ میں حصہ لینے والے ہیں۔ اس اجلاس کو محفوظ طریقے سے منعقد کرنے کے لئے سرینگر میں بالخصوص اور وادی میں بالعموم سیکورٹی کے سخت ترین انتظامات کئے گئے ہیں۔
