امت نیوز ڈیسک ///
سرینگر (نیوز ڈیسک) :صوبہ جموں کے پہاڑی ضلع ڈوڈہ میں بدھ کی صبح پیش آئے دلدوز سڑک حادثہ پر وزیر اعظم نریندر مودی، جموں و کشمیر لیفٹیننٹ گورنر منوج سنہا سمیت کئی سیاسی و سماجی لیڈران نے حادثہ میں ہلاکتوں پر گہرے رنج و غم کا اظہار کرتے ہوئے زخمی ہوئے مسافرین کی جلد صحتیابی کے لئے دعا کی ہے۔ یاد رہے کہ ڈوڈہ کے عسر علاقے میں رونما ہوئے دلدوز سڑک حادثہ میں 36افراد ہلاک جبکہ 15شدید زخمی ہوئے۔
ڈوڈہ حادثہ پر وزیر اعظم کا بیان
وزیر اعظم نریندر مودی کے آفیشل ایکس ہینڈل PMO Indiaمیں وزیر اعظم نے لکھا: ’’ڈوڈہ بس حادثہ سے گہری تشویش (ہوئی)۔‘‘ ٹویٹ میں مودی نے فوت ہوئے افراد کے لواحقین کے ساتھ تعزیت کا اظہار کرتے ہوئے مرنے والوں کے قریبی رشتہ داروں کو وزیر اعظم فنڈ سے دو لاکھ روپے ایکس گریشیا ریلیف دیے جانے کا اعلان کیا ہے۔ مودی نے حادثہ میں زخمی ہوئے افراد کی جلد بازیابی کی امید ظاہر کرتے ہوئے زخمیوں کے لیے پچاس پچاس ہزار روپے کی امداد کا بھی اعلان کیا ہے۔
جموں و کشمیر کے لیفٹیننٹ گورنر نے بھی سماجی رابطہ گاہ ایکس پر ڈوڈہ حادثہ پر تشویش ظاہر کرتے ہوئے فوت ہوئے افراد کے لواحقین کے ساتھ ہمدردی اور یکجہتی کا اظہار کیا ہے۔ ایل جی سنہا نے زخمی ہوئے افراد کی جلد صحتیابی کے لیے بھی دعا کی ہے۔ انہوں نے مزید کہا کہ صوبائی کمشنر کو انہوں نے متاثرہ کنبوں کو ضروری امداد فراہم کرنے کی بھی ہدایت جاری کی ہے۔
محبوبہ مفتی نے کی انتظامیہ سے متاثرین کو امدد فراہم کرنے کی اپیل
ادھر، پیپلز ڈیموکریٹک پارٹی سرپرست اور جموں و کشمیر کی سابق وزیر اعلیٰ محبوبہ مفتی نے بھی ڈوڈہ سڑک حادثہ پر گہری تشویش ظاہر کرتے ہوئے انتظامیہ سے ریسکیو آپریشن جاری رکھنے اور متاثرین کو پوری امداد فراہم کرنے کا بھی مطالبہ کیا ہے۔
کمیونسٹ لیڈر تاریگامی کا اظہار افسوس
سی پی آئی (ایم) کے سینئر لیڈر اور سابق رکن اسمبلی ایم وائی تاریگامی نے بھی ڈوڈہ سڑک حادثہ پر گہری تشویش ظاہر کرتے ہوئے ’’خطے میں پے در پے ہو رہے سڑک حادثات‘‘ پر حکام سے اس جانب توجہ مبذول کرائی ہے۔
مرکزی وزیر داخلہ کا اظہار رنج
مرکزی وزیر داخلہ اور بی جے پی کے سابق صدر امیت شاہ نے ڈوڈہ ضلع کے عسر علاقے میں پیش آئے دلدوز سانحہ پر گہری تشویش ظاہر کی ہے۔ امیت شاہ نے سماجی رابطہ گاہ ایکس پر جاری کیے گئے اپنے بیان میں حادثہ میں فوت ہوئے لواحقین کے ساتھ دلی تعزیت ظاہر کی ہے۔
