امت نیوز ڈیسک //
سری نگر:مرکز کے زیر انتظام یوٹی جموں و کشمیر کے ضلع کولگام کے سامنو علاقے میں سیکورٹی فورسز اور عسکریت پسندوں کے درمیان تصادم آرائی آج بھی جاری ہے۔ علاقے میں ہرطرف سیکورٹی اہلکاروں کا سخت پہرہ ہے اور دونوں طرف سے گولیوں کا تبادلہ جاری ہے۔ اس تصادم کی وجہ سے علاقے میں کشیدگی کا ماحول ہے۔
اس سے قبل کشمیر زون پولیس نے ‘ایکس’ پر ایک پوسٹ کے ذریعے جانکاری فراہم کرتے ہوئے کہا کہ ‘کولگام کے سامنو علاقے میں انکاﺅنٹر شروع ہوا ہے، پولیس اور سیکورٹی فورسز کام میں مصروف ہیں۔ اس سلسلے میں مزید تفصیلات کو شیئر کیا جائے گا۔’ قبل ازیں ذرائع نے بتایا کہ جنگجوﺅں کی موجودگی کے بارے میں اطلاع موصول ہونے پر سکیورٹی فورسز نے جمعرات کی سہ پہر کولگام کے سامنو گاوں کو محاصرے میں لے کر بڑے پیمانے پر آپریشن شروع کیا۔
معلوم ہوا ہے کہ جیسے ہی سلامتی عملے کے اہلکار مشتبہ مقام کے نزدیک پہنچے تو وہاں پر موجود عسکریت پسندوں نے سکیورٹی فورسز پر اندھا دھند فائرنگ شروع کر دی۔ چنانچہ سیکورٹی فورسزنے بھی پوزیشن سنبھال کر جوابی کارروائی کارروائی کا آغاز کیا جس دوران شدیدگولیوں کا تبادلہ شروع ہوا۔ آخری اطلاعات موصول ہونے تک دونوں طرف سے گولیوں کا تبادلہ جاری ہے۔ بتادیں کہ گزشتہ دنوں پلوامہ کے پاریگام میں تصادم آرائی کے دوران ملی ٹینٹ سکیورٹی فورسز کو چکمہ دے کر فرار ہونے میں کامیاب ہوگئے تھے۔
