امت نیوز ڈیسک //
سری نگر: جموں وکشمیر کی گرمائی راجدھانی سری نگر میں سیکورٹی فورسز نے چار ملی ٹینٹ معاونین کی گرفتاری عمل میں لا کر ان کے قبضے سے اسلحہ وگولہ بارود اور قابل اعتراض مواد برآمد کرنے کا دعویٰ کیا۔ پولیس کے ایک ترجمان نے بتایا کہ مصدقہ اطلاع موصول ہونے کے بعد سری نگر پولیس، 50 آر آر اور 29 بٹالین سی آر پی ایف نے کانہامہ نوگام میں شام کے اوقات میں ناکہ لگایا جس دوران ایک سفید رنگ کی آلٹو گاڑی کو روک کر اس میں سوار چار عسکریت پسند معاونین کی گرفتاری عمل میں لائی گئی۔
انہوں نے گرفتار شدگان کی شناخت محمد یاسین بٹ ولد غلام قادر بٹ، شیراز احمد راتھر ولد عبدالرشید راتھر، غلام حسن کھانڈے ولد غلام محمد کھانڈے ساکنان لچھن بل زعفران کالونی پانتھ چوک اور امتیاز احمد بٹ ولد مرحوم عبدل گنائی بٹ ساکن فرستہ بل پانپور کے بطور کی ہے۔ موصوف ترجمان کے مطابق گرفتار شدگان کے قبضے سے ایک اے کے 56 رائفل، تین میگزین، 75 گولیاں، ایک جی لاک پستول دو میگزین ، 26 پستول گولیاں اور 6 چینی ساخت کے گرینیڈ برآمد کرکے ضبط کر لیا گیا۔
انہوں نے مزید بتایا کہ ابتدائی تحقیقات کے دوران پتہ چلا ہے کہ چاروں کالعدم تنظیم جیش کے ساتھ وابستہ ہیں۔ پولیس نے اس ضمن میں ایف آئی آر زیر نمبر 31/2024 زیر دفعات 18,23,39 یو اے پی اے ایکٹ اور آرمز ایکٹ کے تحت نوگام پولیس اسٹیشن میں کیس درج کرکے مزید تحقیقات شروع کی ہے۔
(یو این آئی)
