امت نیوز ڈیسک //
سری نگر، 27 اپریل: گزشتہ کئی دنوں سے لاپتہ ہونے والے تین افراد میں سے دوسری لاش ہفتہ کی صبح وسطی کشمیر ضلع سری نگر کے دریائے جہلم سیمنٹ کدل علاقے سے برآمد ہوئی ہے۔
16 اپریل کو گنڈبل سے بٹوارہ دریائے جہلم کو پار کرنے والے کچھ لوگوں کے ساتھ ایک کشتی ڈوب گئی۔ تاہم، دریا پولیس کی فوری کارروائی سے، چند لوگوں کو بچا لیا گیا اور انہیں فوری طور پر قریبی ہسپتال منتقل کر دیا گیا۔ اس کے بعد سے تین لاپتہ افراد کی لاشوں کی تلاش کے لیے سرچ آپریشن جاری تھا اور آج سیمنٹ کدل کے قریب سے ایک اور شخص کی لاش ملی ہے جبکہ ایک لاش تاحال لاپتہ ہے۔
ایک اہلکار نے نیوز ایجنسی کشمیر اسکرول کو بتایا کہ لاپتہ لاش کا سراغ لگانے کی کوششیں جاری ہیں۔ واقعے میں 9 افراد جان کی بازی ہار گئے، 6 کو پہلے دن سپرد خاک کر دیا گیا جبکہ گزشتہ دو دنوں میں دو لاشیں نکالی گئیں۔(کشمیر اسکرول)
