امت نیوز ڈیسک //
ڈوڈہ: ڈوڈہ ضلع کے ٹراؤن علاقے میں منگل کی شام ایک اسپیشل پولیس آفیسر (ایس پی او) کی اے کے 47 رائفل کے ساتھ ایک شخص لاپتہ ہوگیا جبکہ اس کی گرفتاری کے لیے چھاپے مارے جارہے ہیں۔
خبر رساں ایجنسی – کشمیر نیوز آبزرور (کے این او) کے ذرائع کے مطابق اس شخص کی شناخت محمد رفیع کے طور پر کی گئی ہے جو پرانو کے قریب ترون کا رہنے والا ہے۔ "وہ بھیلہ سے اپنے گاؤں کی طرف آرہا تھا اور اس کے ساتھ ایک اسپیشل پولیس آفیسر تھا جو ہتھیار لے کر جا رہا تھا۔ جب پل ڈوڈہ پہنچے تو ایس پی او صفدر حسین کچھ ضروری سامان خریدنے کے لیے گاڑی سے اترے اور اسی دوران رفیع رائفل سمیت اپنی کار میں فرار ہوگیا۔ گاڑی بھلہ کے جگوٹا علاقے کے قریب سے برآمد ہوئی ہے لیکن گاڑی میں نہ تو رفیع موجود تھا اور نہ ہی ہتھیار،‘‘ ذرائع نے بتایا۔
واقعہ کی تصدیق کرتے ہوئے سینئر سپرنٹنڈنٹ آف پولیس (ایس ایس پی) ڈوڈہ جاوید اقبال نے کے این او کو بتایا کہ رفیع رائفل سمیت فرار ہوگیا ہے اور پولیس اس کا سراغ لگانے کے لیے کام کررہی ہے۔ "وہ اپنے گاؤں میں کہیں بھی چھپا ہو سکتا ہے لیکن ابھی تک اس کا سراغ نہیں لگایا گیا ہے،” انہوں نے مزید کہا۔
دریں اثنا، پولیس نے اس کی گرفتاری اور اسلحہ برآمد کرنے کے لیے چھاپے مارے ہیں۔
