امت نیوز ڈیسک //
غیر قانونی سرگرمیاں (روک تھام) ایکٹ (یو اے پی اے) کے تحت قائم ایک ٹریبونل نے ہفتہ کے روز مسلم لیگ جموں کشمیر (مسرت عالم دھڑے) اور تحریک حریت، جموں و کشمیر پر پانچ سال کی پابندی عائد کرنے کے مرکز کے فیصلے کی توثیق کی۔
دہلی ہائی کورٹ کے جج سچن دتا کا ایک رکنی ٹریبونل جنوری میں انسداد ملی ٹینسی کے سخت قانون کے تحت تشکیل دیا گیا تھا تاکہ اس بات کا جائزہ لیا جا سکے کہ آیا پابندی کے نفاذ کے پیچھے "کافی وجہ” تھی۔
مسلم لیگ جموں کشمیر (مسرت عالم دھڑے) کو 27 دسمبر 2023 کو یو اے پی اے کے تحت حکومت نے یونین ٹیریٹری میں ملک دشمن اور علیحدگی پسند سرگرمیوں میں ملوث ہونے کی وجہ سے پانچ سال کے لیے غیر قانونی قرار دیا تھا۔
مرحوم علیحدگی پسند رہنما سید علی شاہ گیلانی کی طرف سے قائم کی گئی تحریک حریت کو 31 دسمبر 2023 کو پانچ سال کے لیے کالعدم قرار دے دیا گیا تھا۔ اس تنظیم پر جموں و کشمیر میں عسکریت پسندی کو ہوا دینے اور بھارت مخالف پروپیگنڈہ پھیلانے پر پابندی عائد کر دی گئی تھی۔
ایڈیشنل سالیسٹر جنرل ایشوریہ بھاٹی اور ایڈوکیٹ رجت نائر نے ٹریبونل کے سامنے حکومت کی نمائندگی کی۔
