امت نیوز ڈیسک //
سری نگر میں سیکورٹی کے غیر معمولی انتظامات، ڈرونز کے ذریعے نگرانی
سری نگر: ملک کے 78 ویں یوم آزادی کے پیش نظر وادی کشمیر بالخصوص سری نگر میں سیکورٹی بندوبست کو مزید سخت کر دیا گیا ہے۔
یو این آئی اردو کے ایک نامہ نگار نے شہر کے مختلف علاقوں کا دورہ کرنے کے بعد بتایا کہ سری نگر میں کئی مقامات بشمول تجارتی مراکز تاریخی لالچوک، جہانگیر چوک، بتہ مالو وغیرہ میں سیکورٹی فورسز نے ناکے لگائے ہیں جہاں لوگوں کی جامہ تلاشی لی جا رہی ہے اور ان کے شناختی کارڈ بھی چیک کئے جا رہے تھے۔
انہوں نے کہا کہ پیدل سفر کرنے والوں کو بھی ان ناکہ پوائنٹس پر روکا جاتا ہے اور ان کی جامہ تلاشی لی جاتی ہے اور گاڑیوں خاص کر موٹر سائیکل سواروں کو بھی روکا جاتا ہے اور ان کی تلاشی اور پوچھ چھ کی جاتی ہے۔
موصوف نے کہا کہ کئی مقامات پر اضافی چیک پوائٹس قائم کئے گئے ہیں۔
حکام نے بتایا کہ 15 اگست کے پیش نظر سول لائنز علاقوں کی ڈرونز کے ذریعے فضائی نگرانی کی جا رہی ہیں۔
انہوں نے کہا کہ ‘جیسا کہ آپ جانتے ہیں کہ 15 اگست یوم آزادی کا دن ہے لہذا سری نگر کے حساس ترین علاقوں میں ڈرون کیمروں کے ذریعے نگرانی کا عمل تیز کیا گیا ہے۔
ان کا مزید کہنا تھا کہ ‘فضائی نگرانی کا یہ سلسلہ 15 اگست تک جاری رہے گا۔ ان ڈرونز کی مدد سے ہم کسی بھی تخریبی منصوبے کو ٹال سکتے ہیں’۔
پولیس ذرائع کا کہنا ہے کہ ان ڈرونز کو سری نگر کے بخشی اسٹیڈیم جہاں یوم آزادی کی مرکزی تقریب منعقد ہوگی اور دیگر گرد و پیش کے علاقوں کی فضائی نگرانی کے لئے استعمال کیا جائے گا۔
بتا دیں کہ جموں وکشمیر کے لیفٹیننٹ گورنر منوج سنہا بخشی اسٹیڈیم میں منعقد ہونے والی یوم آزادی کی مرکزی تقریب میں پرچم کشائی کریں گے۔
