اپنی پارٹی جموں وکشمیر میں کوئی سیٹ نہ جیت سکی، پارٹی صدر بھی ہار گئے

امت نیوز ڈیسک //
سری نگر:جموں وکشمیر اپنی پارٹی کو اسمبلی انتخابات میں سبھی سیٹوں پر ہار کا سامنا کرنا پڑا یہاں تک کہ پارٹی سربراہ الطاف بخاری کو نیشنل کانفرنس کے امیدوار نے ہرا دیا۔
اطلاعات کے مطابق جموں وکشمیر اپنی پارٹی کے سربراہ الطاف بخاری بھی اپنی سیت نہ بچا سکے اور این سی امیدوار مشتاق گورو نے 13ہزار717ووٹ حاصل کرکے اس نشست پر جیت حاصل کی۔
نامہ نگار نے بتایا کہ اپنی پارٹی کے سربراہ الطاف بخاری چھانہ پورہ نشست پر ایک مضبوط امیدوار کے طورپر دیکھے جارہے تھے لیکن اس بار کے الیکشن میں انہیں ہار کا منہ دیکھنا پڑا۔
نیشنل کانفرنس کے مشتاق احمد گورو نے 13ہزار 717ووٹ حاصل کرکے اس نشست پر جیت حاصل کی جبکہ دوسرے نمبر پر الطاف بخاری نے 8ہزار 29ووٹ حاصل کئے۔
اپنی پارٹی کے نائب صدر غلام حسن میر کو بھی ٹنگمرگ نشست پر ہار کا منہ دیکھنا پڑا۔ یہاں پر نیشنل کانفرنس کے امیدوار فاروق احمد شاہ کو 26ہزار984ووٹ ملے جبکہ غلام حسن میر کو 22ہزار 793ووٹ ملے اور اس طرح سے غلام حسن میر چار ہزار 191ووٹوں سے ہار گئے۔
نامہ نگار کے مطابق اننت ناگ سے اپنی پارٹی کے امیدوار ہلال احمد شاہ بھی ہار گئے اور انہیں چار ہزار 245ووٹ ملے ۔ اس نشست پر کانگریس کے پیرزادہ سعید نے 6ہزار 679ووٹ حاصل کرکے جیت حاصل کی جبکہ محبوبہ بیگ دوسرے نمبر پر آئے۔
لال چوک نشست پر اپنی پارٹی کے امیدوار محمد اشرف میر بھی اپنے مدمقابل نیشنل کانفرنس کے امیدوار شیخ احسن احمد سے ہار گئے۔
شیخ احسن احمد کو 16ہزار 731ووٹ ملے جبکہ اشرف میر کو 5ہزار 388اور اس طرح سے اپنی پارٹی امیدوار 11ہزار 343ووٹوں سے ہار گئے۔