امت نیوز ڈیسک //
وزیر اعظم نریندر مودی کی قیادت میں حکومت جموں و کشمیر سے ملی ٹینسی کا مکمل صفایا کرنے کیلئے پرعزم ہے کی بات کرتے ہوئے وزیر داخلہ امیت شاہ نے کہا کہ مودی حکومت کی مسلسل اور مربوط کوششوں کی وجہ سے جموں و کشمیر میں ملی ٹینسی کا ماحولیاتی نظام نمایاں طور پر کمزور ہوا ہے۔ وزیر داخلہ نے تمام سیکورٹی ایجنسیوں کو ہدایت کی کہ وہ ملی ٹینسی کے خلاف جنگ کو تیز کریں اور صفر دراندازی کے ہدف کو حاصل کریں۔
سی این آئی کے مطابق وزیر داخلہ امیت شاہ نے دوسرے روز بھی جموں کشمیر کی مجموعی سیکورٹی صورتحال کے ساتھ ساتھ دیگر امور کا جائزہ لینے کیلئے نے نئی دلی میں اپنی رہائش گاہ پر اعلیٰ سطحی میٹنگ کی صدارت کی۔ میٹنگ میں وزیر داخلہ کو سیکورٹی حکام نے جموں و کشمیر میں امن و امان کی موجودہ صورتحال پر تفصیلی جانکاری دینے کے علاوہ سرحد پار سے دراندازی کی کوششوں اور ملی ٹنسی سرگرمیوں پربھی تبادلہ خیال کیا گیا ۔
میٹنگ میں قومی سلامتی مشیر اجیت ڈوول، فوجی سربراہ جنر ل ویودی ،، انٹیلی جنس بیورو کے سربراہ ، داخلہ سیکرٹری اجے بھلا، جموں کشمیر کے لیفٹنٹ گورنر منوج سنہا ،چیف سیکرٹر ی اتل ڈولو ، شمالی کمان کے فوجی کمانڈر لیفٹنٹ جنرل سچیندرا ، 15کور کے فوجی کمانڈر ، پولیس سربراہ نلین پربھارت کے ساتھ ساتھ وزارت داخلہ کے اعلیٰ افسران اور سنٹرل آرمڈ پولیس فورسز کے دیگر سینئر افسران نے شرکت کی۔
میٹنگ کے دوران وزیر داخلہ امیت شاہ کو جموں و کشمیر میں امن و امان کی موجودہ صورتحال پر تفصیلی جانکاری دی گئی ۔ اس کے علاوہ لائن آف کنٹرول اور بین الاقوامی سرحد کے ساتھ والے علاقوں کی صورتحال، سرحد پار سے دراندازی کی کوششوں پر بھی تبادلہ خیال کیا گیا۔
میٹنگ سے خطاب کرتے ہوئے امیت شاہ نے کہا کہ وزیر اعظم نریندر مودی کی قیادت میں حکومت جموں و کشمیر سے دہشت گردی کا مکمل صفایا کرنے کے لیے پرعزم ہے۔انہوں نے کہا کہ مودی حکومت کی مسلسل اور مربوط کوششوں کی وجہ سے جموں و کشمیر میں ملی ٹینسی کا ماحولیاتی نظام نمایاں طور پر کمزور ہوا ہے۔ وزیر داخلہ نے تمام سیکورٹی ایجنسیوں کو ہدایت کی کہ وہ ملی ٹینسی کے خلاف جنگ کو تیز کریں اور صفر دراندازی کے ہدف کو حاصل کریں۔
انہوں نے تمام سیکورٹی ایجنسیوں سے کہا کہ وہ ”بے رحم رویہ کے ساتھ دراندازی اور ملی ٹینسی کی کارروائیوں“ پر مزید سخت کارروائی کریں۔ انہوں نے کہا کہ دہشت گردوں کے وجود کو جڑ سے اکھاڑ پھینکنا ہمارا ہدف ہونا چاہیے۔امیت شاہ نے کہا کہ نارکو نیٹ ورک دراندازوں اور ملی ٹینسی کو اپنی سرگرمیاں انجام دینے میں مدد فراہم کر رہا ہے۔ انہوں نے کہا کہ منشیات کی تجارت سے حاصل ہونے والی آمدنی سے ملی ٹینٹ مالی معاونت کے خلاف فوری کارروائی کرنے کی ضرورت ہے۔ امیت شاہ نے ایجنسیوں کو ہدایت دی کہ وہ نئے فوجداری قوانین کے بروقت نفاذ کے پیش نظر فارنسک سائنس لیبارٹری کے عہدوں پر نئی تقرری کریں۔شاہ نے ملی ٹینسی سے پاک جموں و کشمیر کے مقصد کو حاصل کرنے کیلئے ملی ٹینسی کے خلاف مودی حکومت کی ’زیرو ٹالرنس‘ کی پالیسی پر زور دیا۔
انہوں نے تمام سیکورٹی ایجنسیوں کو چوکس رہنے اور جموں و کشمیر میں اسکو کو ختم کرنے کے لئے ہم آہنگی سے کام کرنے کی ہدایت کی۔بیان میں مزید کہا گیا کہ مرکزی وزیر داخلہ نے جموں و کشمیر میں سیکورٹی کے تمام معیارات میں نمایاں بہتری لانے کے لئے سیکورٹی ایجنسیوں کی کوششوں کی تعریف کی۔
