امت نیوز ڈیسک //
سری نگر:میرواعظ کشمیر مولوی محمد عمر فاروق نے انتظامیہ کی جانب سے مزید سرکاری ملازمین کو نوکریوں سے برطرف کرنے کے اقدام کو انتہائی آمرانہ اورقابل مذمت قرار دیتے ہوئے کہا ہے کہ لگتا ہے حکمران آہستہ آہستہ تمام کشمیریوں کو سرکاری ملازمتوں سے ہٹا کر بے روزگار کرنا چاہتے ہیں؟
انہوں نے کہا کہ منتخب نمائندوں کا فرض ہے کہ وہ اپنے منشور میں کیے گئے وعدے کے مطابق اس مسئلے کو فوری طور پر متعلقہ حکام کے ساتھ اٹھائیں اور ہراسانی کے اس عمل کو روک دیں۔
میرواعظ نے اسلامی لٹریچر پر کریک ڈاون کرنے اور انہیں کتابوں کی دکانوں سے ضبط کرنے کی کارروائی کو مضحکہ خیزعمل قرار دیتے ہوئے کہا کہ ایک ایسے وقت میں جب کہ ہر قسم کی معلومات ورچوئل ذرائع سے بآسانی دستیاب ہیں، کتابیں ضبط کرنا اور سوچ پر پہرہ بٹھانا سراسر بے معنی ہے۔
