امت نیوز ڈیسک //
ضلع ڈوڈہ کے بھدرواہ علاقے میں ایک مخصوص فرقے کے خلاف سوشل میڈیا پر حساس اور اشتعال انگیز مواد اپلوڈ کیے جانے کے خلاف انجمن اسلامیہ بھدرواہ کی کال پر ہفتہ کے روز مکمل ہڑتال کی گئی۔
اس دوران تمام کاروباری ادارے بند رہے اور علاقے میں معمولاتِ زندگی مفلوج ہوکر رہ گئے۔ڈپٹی کمشنر ڈوڈہ ہرویندر سنگھ نے اس حوالے سے بتایا کہ بھدرواہ کے ایک مقامی شخص نے سوشل میڈیا پلیٹ فارم پر غیر ذمہ دارانہ اور فرقہ وارانہ ہم آہنگی کو متاثر کرنے والا مواد شیئر کیا، جس پر فوری کارروائی عمل میں لاتے ہوئے مذکورہ شخص کے خلاف ایف آئی آر درج کر لی گئی ہے۔
ضلع ترقیاتی کمشنر نے عوام سے پرزور اپیل کی کہ وہ سوشل میڈیا پر غیر مصدقہ، اشتعال انگیز یا نفرت انگیز مواد، ویڈیوز اور پیغامات کو شیئر یا فارورڈ کرنے سے مکمل طور پر گریز کریں تاکہ علاقے میں امن و امان کی فضا کو برقرار رکھا جا سکے۔
انتظامیہ نے معاملے کی حساسیت کو مدنظر رکھتے ہوئے احتیاطی اقدام کے طور پر بھدرواہ میں انٹرنیٹ کی رفتار کو محدود کر دیا ہے تاکہ اشتعال انگیز ویڈیوز اور پیغامات کی اشاعت کو روکا جا سکے۔
ڈی سی ہرویندر سنگھ نے مزید کہا کہ ماہِ رمضان کے دوران علاقے میں مثالی امن و سکون برقرار رہا، اور عوام سے اپیل کی کہ نوراتری کے مقدس موقع پر بھی بین المذاہب بھائی چارے، رواداری اور ہم آہنگی کو قائم رکھا جائے۔
اُن کا کہنا تھا کہ ایسے عناصر جو نفرت انگیز مواد کے ذریعے مذہبی جذبات کو مجروح کرتے ہیں، سماج میں اُن کے لیے کوئی جگہ نہیں ہے۔
