امت نیوز ڈیسک //
جموں: وزیر اعظم نریندر مودی کے 19 اپریل کو طے شدہ دورہ جموں و کشمیر کے پیش نظر ضلع ریاسی اور اس کے ملحقہ علاقوں میں سیکورٹی کے غیر معمولی انتظامات کیے جا رہے ہیں۔
واضح رہے کہ وزیر اعظم 19 اپریل کو ادھم پور-سرینگر-بارہمولہ ریلوے لنک (یو ایس بی آر ایل) پروجیکٹ کا باقاعدہ افتتاح کریں گے، جس میں دریائے چناب پر تعمیر کیا گیا دنیا کا بلند ترین ریلوے پل بھی شامل ہے۔
اس ہائی پروفائل تقریب کے پیش نظر، اعلیٰ سطحی سیکیورٹی اور انٹیلی جنس ایجنسیاں قریبی تال میل کے ساتھ ملٹی لیئرڈ سیکیورٹی گرڈ قائم کر رہی ہیں تاکہ کسی بھی ممکنہ خطرے سے نمٹا جا سکے۔
ایک اعلیٰ اہلکار نے بتایا، "ہم اضافی فورسز تعینات کر رہے ہیں اور تمام ممکنہ راستوں پر الیکٹرانک نگرانی کو متحرک کیا جا رہا ہے۔”
سیکورٹی گرڈ میں ڈرون نگرانی، تلاشی آپریشن اور ضلعی و مرکزی سیکیورٹی اداروں کے درمیان بھرپور ہم آہنگی شامل ہے۔
حکام نے کہا کہ تقریب کی قومی اہمیت کے پیش نظر کسی بھی قسم کی کوتاہی کی کوئی گنجائش نہیں چھوڑی جا رہی۔
معلوم ہوا ہے کہ حساس علاقوں میں تخریب کاری مخالف چیکنگ جاری ہے، جبکہ ’یو ایس بی آر ایل‘ پروجیکٹ کے تحت آنے والی ریلوے تنصیبات، پلوں اور سرنگوں پر خصوصی نظر رکھی جا رہی ہے۔
حکام کا کہنا ہے کہ،اہم انفراسٹرکچر کی حفاظت اولین ترجیح ہے، جلسے کے مقام کے اطراف میں گاڑیوں کی نقل و حرکت کو محدود کیا جائے گا، اور جلد ہی ٹریفک ایڈوائزری جاری کی جائے گی۔
انہوں نے مزید بتایا کہ انٹیلی جنس یونٹوں کو ہدایت دی گئی ہے کہ وہ علاقے میں کسی بھی مشکوک سرگرمی پر گہری نظر رکھیں۔
ریلوے حکام کے مطابق، ’یو ایس بی آر ایل‘ پروجیکٹ کا 272 کلومیٹر طویل حصہ، جس میں 119 کلومیٹر سرنگیں شامل ہیں، جموں و کشمیر کے لیے رابطے کے شعبے میں ایک انقلابی پیش رفت ہے۔ اس منصوبے سے نہ صرف سفر کے وقت میں نمایاں کمی آئے گی بلکہ خطے میں اقتصادی ترقی اور سیاحت کو بھی فروغ ملے گا۔
ریلوے افسر نے کہا، "کشمیر کے لیے ٹرین چلانا ہر ہندوستانی کا خواب رہا ہے۔ برسوں کی محنت اور تیاری کے بعد اب یہ خواب حقیقت بننے جا رہا ہے۔ یہ منصوبہ مذہبی سیاحت، مقامی رابطے اور قومی یکجہتی کی ایک اہم علامت ہے۔”
