امت نیوز ڈیسک //
سرینگر: جموں و کشمیر بورڈ آف اسکول ایجوکیشن نے بدھ کی سہ پہر بارہویں جماعت کے امتحانی نتائج کا اعلان کیا، جس میں 75 فیصد امیدواروں نے کامیابی حاصل کی ہے۔ بورڈ آف اسکول ایجوکیشن کی جانب سے فراہم کردہ اعداد و شمار کے مطابق اس امتحان میں مجموعی طور پر103308 امیداوار شامل ہوئے تھے جن میں77,311 امیداوار کامیاب قرار دیئے گئے۔ اس سالانہ امتحان میں پاس ہونے والی لڑکیوں کی مجموعی تعداد 78 فیصد رہی، جبکہ لڑکوں کی تعداد 72 فیصد ہے۔
بدھ کی صبح ہی سے سوشل میڈیا پر بارہویں جماعت کے امتحانی نتائج ظاہر ہونے کی خبریں گرشت کر رہی تھی، جس کے نتیجے میں وادی کے اطراف و اکناف میں امیداوار اپنے اپنے نتائج دیکھنے کی خاطر بورڈ کی ویب سائٹ پر اپنی نظریں لگائے بیٹھے تھے۔ ایسے میں اب نتائج ظاہر ہونے کے ساتھ ہی کہیں خوشی اور کہیں غم کا ماحول دیکھنے کو مل رہا ہے۔
واضح رہے کہ بارہویں جماعت کے بعد آنے والے چند دنوں میں بورڈ آف اسکول ایجوکیشن دسویں جماعت کے سالانہ امتحانات کے نتائج بھی سامنے لا رہا ہے۔ یاد رہے کہ گزشتہ برس نیشنل کانفرنس نے اقتدار میں آنے کے چند دنوں کے اندر ہی جموں و کشمیر میں یکساں تعلیمی کلینڈر کو تبدیل کر کے نومبر دسمبر سیشن دوبارہ سے بحال کیا۔ جس کے مطابق 2024 میں نویں جماعت تک سالانہ امتحانات نومبر دسمبر میں لئے گئے تھے جبکہ بورڈ آف اسکول ایجوکیشن نے دسویں اور بارہویں جماعت کے امتحانات فروری سے مارچ کے درمیان منعقد کئے۔تاہم رواں برس سے میٹرک اور بارہویں جماعت تک امتحانات بھی ماضی کی طرح اکتوبر نومبر میں لیے جائیں گے۔
