امت نیوز ڈیسک //
اننت ناگ : جموں کشمیر کے لیفٹیننٹ گورنر منوج سنہا نے پہلگام حملے میں ازجان ہوئے گھوڑے بان سید عادل حسین کی اہلیہ کو سرکاری نوکری کا تقرری نامہ (اپائنٹمنٹ لیٹر) سونپا۔ ایل جی نے ہفتہ کو متوفی عادل حسین کی رہائش گاہ واقع اننت ناگ کے ہاپت ناڑ کا دورہ کیا اور مرحوم کے لواحقین کے ساتھ تعذیت کا اظہار کیا۔ عادل حسین 22 اپریل کو پہلگام حملے میں 25 سیاحوں کے ہمراہ اس وقت ہلاک کیے گئے تھے جب انہوں نے سیاحوں کو بچانے کی کوشش کے دوران حملہ آوروں سے بحث کی اور ان کا اسلحہ چھیننے کی بھی کوشش کی تھی، تاہم اس دوران وہ حملہ آوروں کی فائرنگ سے موت کی آغوش میں چلے گئے۔
اپنے دورے کے دوران لیفٹیننٹ گورنر منوج سنہا نے عادل حسین کی اہلیہ گلناز اختر کو ’’عادل کی قربانی کو خراج تحسین پیش کرنے‘‘ اور ’’غمزدہ خاندان کی مدد‘‘ کے لیے سرکاری نوکری کا اپائنٹمنٹ لیٹر پیش کیا۔
اس موقع پر لیفٹیننٹ گورنر نے کہا کہ انہوں نے غمزدہ خاندان سے ملنے اور انہیں امداد فراہم کرنے کا پہلے ہی منصوبہ بنایا تھا۔ انہوں نے کہا کہ متاثرہ کے خاندان کے رکن کو مستقل ملازمت کا مقصد ان کی مدد کرنا تھا کیونکہ وہ اپنا واحد کمانے والا کھو چکے ہیں۔ عادل کے اہل خانہ نے ایل جی حکومت کا شکریہ ادا کیا ہے۔
قبل ازیں، عادل حسین کے بھائی نزاکت احمد کو بھی نوکری فراہم کی گئی تھی۔ نزاکت کو جموں کشمیر وقف بورڈ کی چیئرپرسن ڈاکٹر درخشان اندرابی نے تقرری نامہ پیش کیا تھا اور نزاکت کو وقف بورڈ میں ملازمت فراہم کی گئی تھی
