امت نیوز ڈیسک //
بدگام، 01 اکتوبر : بڈگام پولیس نے حیدرپورہ میں کالعدم تنظیم تحریکِ حریت کے ہیڈ آفس کو غیر قانونی سرگرمیوں کی روک تھام ایکٹ کے تحت سیل کر دیا ہے۔ تین منزلہ یہ عمارت، جو ایک کنال ایک مرلہ زمین پر مشتمل ہے، ملی ٹینسی سے جڑی سرگرمیوں کی تحقیقات کے سلسلے میں ضبط کی گئی ہے۔
پولیس ترجمان نے کشمیر نیوز کارنر (کے این سی) کو جاری ایک بیان میں کہا کہ بڈگام پولیس نے علیحدگی پسند اور عسکری نیٹ ورکس کے خلاف بڑی کارروائی کرتے ہوئے رحمت آباد، حیدرپورہ میں کالعدم تحریکِ حریت کے مرکزی دفتر کو غیر قانونی سرگرمیوں کی روک تھام ایکٹ 1967 کی دفعہ 25 کے تحت منسلک کر دیا ہے۔
ترجمان نے کہا کہ شواہد کی بنیاد پر اور مجاز اتھارٹی کی منظوری کے بعد اس جائیداد کو قانونی تقاضوں کے مطابق منسلک کیا گیا۔ یہ کارروائی غیر قانونی اور تخریبی سرگرمیوں کے خلاف جاری تحقیقات میں ایک اہم قدم ہے اور اس بات کی عکاسی کرتی ہے کہ بدگام پولیس قومی سلامتی کے خلاف خطرات کو ختم کرنے اور خطے میں امن قائم رکھنے کے لیے پرعزم ہے۔
بیان میں مزید کہا گیا کہ بڈگام پولیس دیگر ایجنسیوں کے ساتھ مل کر ان افراد اور تنظیموں کے خلاف سخت اقدامات جاری رکھے گی جو ملک کی خودمختاری اور سالمیت کے خلاف سرگرمیوں میں ملوث ہیں۔ (کے این سی)
