امت نیوز ڈیسک :
نئی دہلی: بھارتی فضائیہ کے سربراہ ایئر چیف مارشل امر پریت سنگھ نے جمعہ کو کہا کہ آپریشن سندور میں پاکستان کے ایف-16 اور جے-17 لڑاکا طیارے تباہ کیے گئے۔
انہوں نے کہا کہ بھارت نے آپریشن سندور ایک واضح ہدف کے ساتھ شروع کیا، اور جیسے ہی مقصد پورا ہوا مختصر وقت میں تنازع ختم کرنا دنیا کے لیے بھارت سے سیکھنے کا سبق ہے۔
ایئر فورس ڈے سے قبل پریس کانفرنس سے خطاب کرتے ہوئے ایئر چیف مارشل نے بتایا کہ فضائیہ نے اپنی جنگی صلاحیتوں کو بڑھانے کے لیے "روڈمیپ 2047” تیار کیا ہے۔
آپریشن سندور کے مختلف پہلوؤں پر بات کرتے ہوئے انہوں نے کہا کہ یہ تینوں افواج (بری، بحری اور فضائیہ) کے درمیان بہترین ہم آہنگی کی عکاسی کرتا ہے۔
جب ان سے پاکستان کے نقصان کے بارے میں پوچھا گیا تو انہوں نے کہا:
"فضا میں ہمارے پاس ایک ایئر بورن وارننگ اینڈ کنٹرول سسٹم (AWACS) اور چار سے پانچ لڑاکا طیارے — غالباً ایف-16 اور جے-17 — کو نشانہ بنانے کے شواہد موجود ہیں۔”
انہوں نے مزید کہا کہ پاکستان کے نقصانات میں ریڈارز، کمانڈ اینڈ کنٹرول مراکز، رن ویز اور ہینگرز بھی شامل ہیں۔
ایک سوال کے جواب میں ایئر چیف نے کہا کہ تینوں افواج نے ‘سدرشن چکر’ فضائی دفاعی نظام پر کام شروع کر دیا ہے۔
