امت نیوز ڈیسک //
مرکزی حکومت نے لوک سبھا کو بتایا ہے کہ نیشنل ہائیڈرو الیکٹرک پاور کارپوریشن جموں و کشمیر میں 27,945 کروڑ روپے کی لاگت سے چار بڑے آبی بجلی منصوبوں پر کام کر رہی ہے، جن سے مجموعی طور پر 3014 میگاواٹ بجلی پیدا ہوگی۔ یہ منصوبے ریاست میں طویل عرصے سے جاری بجلی کی قلت کو کم کرنے میں اہم کردار ادا کریں گے۔
مرکزی وزیر توانائی منوہر لال نے بتایا کہ این ایچ پی سی، رتلے ہائیڈرو پاور کارپوریشن لمیٹڈ اور چناب ویلی پاور پروجیکٹس لمیٹڈ کے اشتراک سے چناب بیسن میں یہ منصوبے نافذ کیے جا رہے ہیں۔ ان میں 850 میگاواٹ رتل ہائیڈرو الیکٹرک پروجیکٹ، 1000 میگاواٹ پکل ڈُل، 624 میگاواٹ کیرو اور 540 میگاواٹ کوار منصوبے شامل ہیں، جن کی تکمیل 2026 سے 2028 کے درمیان متوقع ہے۔
حکومت کے مطابق ان منصوبوں سے بجلی کی دستیابی میں نمایاں بہتری آئے گی، صنعتی اور اقتصادی سرگرمیوں کو تقویت ملے گی اور مقامی لوگوں کے لیے روزگار کے نئے مواقع پیدا ہوں گے۔ اس کے ساتھ ساتھ یہ منصوبے ملک کے صاف اور پائیدار توانائی کے اہداف میں بھی اہم حصہ ڈالیں گے۔
