امت نیوز ڈیسک //
کشتواڑ، 11 جنوری:جموں و کشمیر کے ضلع کشتواڑ میں ایک دلخراش واقعہ پیش آیا جہاں 16 سالہ لڑکے کی موت اس وقت ہو گئی جب اس کے والد کی رائفل سے حادثاتی طور پر گولی چل گئی، حکام نے اتوار کو بتایا۔
یہ واقعہ ہفتہ کی رات مغل میدان کے علاقے میں واقع لوئی دھار گاؤں میں پیش آیا۔ حکام کے مطابق، ولیج ڈیفنس گارڈ کے رکن پیارے لال رات تقریباً 9:30 بجے اپنے گھر میں سروس رائفل کی صفائی کر رہے تھے کہ اچانک رائفل سے گولی چل گئی۔
گولی ان کے بیٹے انوج کمار کو لگی جو دسویں جماعت کا طالب علم تھا، اور وہ موقع پر ہی جاں بحق ہو گیا۔
اطلاع ملتے ہی پولیس اہلکار موقع پر پہنچ گئے۔ متوفی کی لاش کو پوسٹ مارٹم کے لیے چھترو اسپتال منتقل کیا گیا۔
حکام کا کہنا ہے کہ حادثاتی فائرنگ کے اس واقعے کے اصل اسباب جاننے کے لیے انکوائری شروع کر دی گئی ہے۔ واقعے میں استعمال ہونے والی رائفل کو ضبط کر کے فارنسک جانچ کے لیے بھیج دیا گیا ہے جبکہ اہل خانہ کے بیانات بھی قلمبند کیے جا رہے ہیں۔ [کے این ٹی]
