امت نیوز ڈیسک //
واشنگٹن: امریکی صدر ڈونلڈ ٹرمپ نے کہا ہے کہ ایران میں جاری احتجاج کے تناظر میں واشنگٹن “سخت اختیارات” پر سنجیدگی سے غور کر رہا ہے، جن میں ممکنہ فوجی کارروائی بھی شامل ہو سکتی ہے۔
ایئر فورس ون میں صحافیوں سے گفتگو کرتے ہوئے صدر ٹرمپ نے کہا، “ہم اس معاملے کو نہایت سنجیدگی سے دیکھ رہے ہیں۔ فوج بھی اس کا جائزہ لے رہی ہے، اور ہم کچھ بہت سخت آپشنز پر غور کر رہے ہیں۔ ہم جلد اس بارے میں فیصلہ کریں گے۔”
صدر ٹرمپ نے مزید کہا کہ ایران کی قیادت نے ان کی جانب سے فوجی کارروائی کی دھمکیوں کے بعد رابطہ کیا ہے اور “مذاکرات کے لیے آمادگی” ظاہر کی ہے، جس کے لیے ایک ملاقات طے کی جا رہی ہے۔
تاہم انہوں نے خبردار کیا کہ “ایسا بھی ہو سکتا ہے کہ ہمیں ملاقات سے پہلے ہی کوئی قدم اٹھانا پڑے۔”
