امت نیوز ڈیسک //
کشتواڑ، 9 فروری:ضلع کشتواڑ کے چتروو علاقے میں سیکورٹی فورسز کا انسدادِ عسکریت پسندی آپریشن پیر کے روز 20ویں مسلسل دن میں داخل ہو گیا۔ حکام کے مطابق آپریشن تراشی-1 کے تحت جنگلاتی علاقوں میں چھپے مشتبہ عسکریت پسندوں کی تلاش کے لیے محاصرہ اور تلاشی کارروائیاں بدستور جاری ہیں۔
ذرائع نے بتایا کہ آسام رائفلز کے دستے گھنے جنگلات کے اندر مسلسل سرچ آپریشن انجام دے رہے ہیں اور مشتبہ ملی ٹینٹوں کے ٹھکانوں پر دباؤ برقرار رکھا گیا ہے۔ عسکریت پسندوں کی نقل و حرکت کو روکنے اور علاقے میں سیکورٹی یقینی بنانے کے لیے پورے خطے کی کڑی نگرانی کی جا رہی ہے۔
سیکورٹی اہلکار مشکل جغرافیائی حالات اور گھنے جنگلاتی پٹیوں میں مربوط حکمتِ عملی کے تحت تلاشی مہم چلا رہے ہیں تاکہ مشتبہ عسکریت پسندوں کا سراغ لگا کر انہیں بے اثر کیا جا سکے۔ حکام کا کہنا ہے کہ علاقے کی دشوار گزار زمین اور گھنی نباتات کے باعث آپریشن نہایت احتیاط کے ساتھ انجام دیا جا رہا ہے۔
ذرائع کے مطابق محاصرے کو مضبوط بنانے اور ممکنہ فرار کے راستوں کو بند کرنے کے لیے اضافی فورسز تعینات کی گئی ہیں۔ اس کے ساتھ ساتھ رات کے وقت نگرانی اور علاقے پر مکمل کنٹرول کے اقدامات میں بھی اضافہ کیا گیا ہے۔
حکام نے کہا کہ آپریشن کا طویل دورانیہ اس بات کی عکاسی کرتا ہے کہ سیکورٹی ایجنسیاں اس مشن کو کس قدر سنجیدگی سے انجام دے رہی ہیں، اور جب تک پورے علاقے کو مکمل طور پر کلیئر نہیں کر لیا جاتا، تلاشی کارروائیاں جاری رہیں گی۔
[کے این ٹی]
